İrakli Kobaxidze: “Avropa bürokratiyası faciəvi vəziyyətdədir – Gürcüstan üzrə məruzəçi açıq şəkildə çevriliş aksiyasını dəstəkləyirdi”
Gürcüstanın baş naziri İrakli Kobaxidze bildirib ki, Avropa Parlamentinin Gürcüstan üzrə rəsmi məruzəçisi Rasa Yukneviçiene ölkədə baş tutan 4 oktyabr aksiyasını açıq şəkildə dəstəkləyib, bu isə Avropa bürokratiyasının “nə qədər dərin böhranda olduğunu” bir daha göstərir.
InterPress.ge xəbər verir ki, baş nazir bu barədə hökumət administrasiyasında keçirilən brifinqdə danışıb.
“Avropa Parlamentində bir qrup deputat var ki, onlar əslində xarici agentlərdir – onlara Gürcüstan əleyhinə nə tapşırırlarsa, onu qeyd-şərtsiz yerinə yetirirlər. Onlar Avropa Parlamentində ölkəmizə qarşı bu ssenarini aparırlar və vaxtaşırı belə bəyanatlar verirlər. Gürcüstan məsələləri üzrə Avropa Parlamentinin rəsmi məruzəçisi olan xanım Rasa Yukneviçiene isə çevriliş aksiyasına birbaşa operativ dəstək göstərirdi. Onun hansı saatda, hansı bəyanatla çıxış etdiyini, necə canfəşanlıqla bu aksiyanı dəstəklədiyini hər kəs görə bilər,” – deyə Kobaxidze bildirib.
Baş nazir əlavə edib ki, belə davranışlar Avropa qurumlarının içində mövcud olan “bürokratik fəlakəti” açıq şəkildə nümayiş etdirir:
“Görün, Avropa bürokratiyası nə vəziyyətə düşüb. Gürcü cəmiyyəti bu mənzərəni çox yaxşı görür. Məhz bu riyakarlığa və utancverici hərəkətlərə qarşı çıxmaq üçün 1 milyon 100 mindən çox seçici 4 oktyabrda seçkilərdə ‘Gürcü Arzusuna’ səs verdi,” – deyə Kobaxidze qeyd edib.
Kobaxidze həmçinin vurğulayıb ki, Gürcüstanda “hakimiyyətin devrilməsi cəhdinə” qarşı çıxan seçicilərin bu dəstəyi “Gürcü xalqının suverenliyə və sabitliyə sadiqliyinin sübutudur”.
