İrakli Kobaxidze: “Namizəd ölkələr arasında liderliyimiz mübahisəsizdir”

Namizəd ölkələr arasında Gürcüstanın lider mövqeyi heç bir şübhə doğurmur və bunu bütün faktlar və obyektiv reytinqlər təsdiqləyir.

InterPress.ge xəbər verir ki, bu barədə Gürcüstanın Baş naziri İrakli Kobaxidze bildirib.

Hökumət başçısı hökumətlərin fəaliyyətinin qlobal qiymətləndirilməsi indeksinə münasibət bildirərkən qeyd edib ki, Gürcüstan reytinqlərdə yalnız namizəd ölkələri deyil, Avropa İttifaqının bir sıra üzv dövlətlərini də qabaqlayır.

“Əgər Gürcüstanı namizəd ölkələrlə müqayisə etsək, bütün istiqamətlərdə biz mütləq liderik və təkcə namizəd ölkələr arasında deyil. Bütün parametrlərə, indekslərə və reytinqlərə görə Avropa İttifaqının bir sıra ölkələrini də qabaqlayırıq. Bu, ölkəmizdə mövcud olan ümumi vəziyyəti – həm demokratik, həm də iqtisadi baxımdan – əks etdirir. Bütün istiqamətlərdə Gürcüstan qabaqcıl ölkədir, liderdir. Namizəd ölkələr arasında liderliyimiz mübahisəsizdir. Bunu bütün faktlar və obyektiv reytinqlər sübut edir”, – deyə İrakli Kobaxidze vurğulayıb.