14 
Mar
2024
16:07
222

Gürcüstan parlamentinin Təhsil, elm və gənclər məsələləri üzrə komitəsinin sədri Azərbaycanın Diasporla İş üzrə Dövlət Komitəsində olub - FOTO

Gürcüstan Parlamentinin Təhsil, elm və gənclər məsələləri üzrə komitəsinin sədri Givi Mikanadzenin başçılıq etdiyi nümayəndə heyəti Azərbaycanın Diasporla İş üzrə Dövlət Komitəsində olub.

InterPress.ge xəbər verir ki, görüş zamanı Diasporla İş üzrə Dövlət Komitəsinin sədri Fuad Muradov əsası Ümummilli lider Heydər Əliyev tərəfindən qoyulmuş Dövlət Komitəsinin fəaliyyət istiqamətləri, diaspor quruculuğu istiqamətində görülən işlər haqqında ətraflı məlumat verib. 

Görüşdə hazırda iki ölkə arasında mövcud olan strateji tərəfdaşlığın yüksək dinamikasının, Azərbaycanın müəllifi olduğu enerji və digər iqtisadi layihələrin regional inkişaf və sülhün möhkəmləndirilməsinə verdiyi tövhələrin arxasında ölkə rəhbərlərinin möhkəm iradəsinin dayandığı qeyd olunub.

Komitə sədri F.Muradov Gürcüstanda yaşayan azərbaycanlılarla bağlı həyata keçirilən layihələrdən söz açıb, soydaşların yerli cəmiyyətə inteqrasiyası, mümkün assimilyasiya amillərinin aradan qaldırılmasının vacibliyini, Gürcüstanın ali təhsil müəssisələrində təhsil alan azərbaycanlı gənclərin ölkənin sosial-ictimai həyatında iştirakının yüksəldilməsinin zərurətini bildirib və bu istiqamətlərdə görülən işlər barədə danışıb.

Gürcüstan nümayəndə heyətinə azərbaycanlıların kompakt yaşadığı ərazilərdə fəaliyyət göstərən inteqrasiya mərkəzləri barədə ətraflı məlumat verilib. Tbilisi şəhərində və Kvemo-Kartlidə 5 mərkəzin fəaliyyət göstərdiyi, Azərbaycan, gürcü və digər dillərin tədris edildiyi, müxtəlif incəsənət və idman növlərinin öyrədildiyi, abituriyent hazırlığı aparıldığı və s. nəzərə çatdırılıb. Tbilisidəki “Qanun” Hüquq Mərkəzinin ötən il 1280 nəfər soydaşımıza hüquqi məsələlərlə bağlı kömək etdiyi qeyd olunub.

Eyni zamanda qeyd edilib ki, Rustavidə yaşayan Azərbaycan icması tərəfindən yeni yaradılmış “Rustavi Təhsil və Mədəniyyət Mərkəzi” vasitəsilə bölgədə yaşayan soydaşlarımızın Azərbaycan, gürcü və ingilis dili üzrə tələbatlarının ödənilməsi ilə bağlı Komitəyə layihə təqdim olunmuşdur. Layihə müsbət cavablandırılıb və yaxın gələcəkdə sözügedən fənnlər üzrə mərkəzdə dərslər tədris olunacaq.

G.Mikanadze iki ölkə arasında çoxəsrlik dostluq, mehriban qonşuluq münasibətlərinin olduğunu bildirib. Mikanadze azərbaycanlıların yerli cəmiyyətə inteqrasiyası istiqamətində dövlət tərəfindən görülən işlər, gürcü dili ilə bağlı həyata keçirilən layihələr, azərbaycanlıların təhsil imkanlarının genişləndirilməsi barədə danışıb.

Gürcüstan parlamentinin Təhsil, elm və gənclər məsələləri üzrə komitəsinin sədri səfər çərçivəsində müxtəlif dövlət qurumları ilə əməkdaşlıq məsələlərini müzakirə etdiklərini, Dövlət Komitəsinin də birgə əməkdaşlığa hazır olmasından məmnunluğunu ifadə edib.

Bizimlə əlaqə saxlayın