Aİ səfiri Gürcüstanın siyasi liderlərinə çağırış etdi
"Qərbi Balkan ölkələrinin təcrübəsindən demək olar ki, bu islahatlara bu cür yanaşan ölkələr kosmetik dəyişikliklər edənlərə nisbətən daha tez uğur qazanırlar".
InterPress.ge xəbər verir ki, bu barədə Avropa İttifaqının Gürcüstandakı səfiri Pavel Herçinski Gürcüstan və Qərbi Balkan ölkələrinin Avropaya inteqrasiya məsələlərinə dair parlament konfransında bildirib.
"Gürcüstana gəlincə, ötən ilin 12 prioriteti və hazırkı 9 addımda parlamentin rolu həlledicidir. Mən Gürcüstanın bütün siyasi liderlərini bu islahatlara çox ciddi baxmağa çağırıram. Səhv etməməliyik. Bu islahatlar transformativ olmalıdır. Unutmamalıyıq ki, doqquz addım üzərində işləməkdən daha çox şey lazımdır”, - səfir qeyd edib.
Onun sözlərinə görə, Gürcüstana dair Avropa İttifaqının noyabrda dərc etdiyi hesabatda onun Avropa İttifaqının normativ-hüquqi bazasına (acquis) uyğunlaşdırılması üçün aydın addımlar müəyyən edilib.
“Avropa İttifaqının bu tövsiyələri parlament, hökumət, müxalifət və vətəndaş cəmiyyətinin birgə fəaliyyətini tələb edir. Gürcüstan yaxın aylarda və illərdə nə edəcəyini bilmək istəyirsə, cavabların əksəriyyəti bu hesabatdadır. Bir çox sahələr vaxt və pul tələb edir. Bu nöqteyi-nəzərdən, nə qədər tez başlasanız, bir o qədər asan olacaq və uğur qazanıb Aİ standartlarını tətbiq etməyə başlasanız, özəl sektor da daxil olmaqla investisiyaları cəlb edə biləcəksiniz. İnvestorlar Aİ qaydalarının tətbiqi və vahid bazara inteqrasiyanın gətirdiyi sabitliyi yüksək qiymətləndirirlər", - səfir qeyd edib.
Onun sözlərinə görə, islahatların həyata keçirilməsi üçün milli konsensus çox vacibdir.
“Gürcüstanın Aİ-yə üzvlük yolunu sürətləndirən və açıq şəkildə Qərbi Balkan ölkələrinin təcrübəsinə əsaslanan bir siyasi faktorun adını çəkməli olsam, bu, Aİ-yə üzvlüklə bağlı milli konsensusun inkişafı olardı. Bu islahatları həyata keçirmək üçün bütün siyasi qüvvələr öz siyasi fikir ayrılıqlarını bir kənara qoymalıdırlar. Təcrübə bizə göstərir ki, siyasi konsensusun olmaması üzvlük prosesinə mane olur", - səfir qeyd edib.
