“Binanın sökülməsi və yeni layihənin həyata keçirilməsi zəruri olacaq. Digər girişlərdə yaşamağa davam edən sakinlər də əgər əvəzləmə proqramında iştirak etmək istəsələr, bələdiyyə müvafiq layihəni həyata keçirməyə hazırdır”.
InterPress.ge xəbər verir ki, bu barədə Tbilisi meri Kaxa Kaladze Poniçalada baş verən partlayış nəticəsində xəsarət alanları ziyarət etdiyi İnqorokva Universitet Klinikasında jurnalistlərə bildirib.
Onun sözlərinə görə, 28 ailə müvəqqəti olaraq hotelə yerləşdirilib. Növbəti mərhələdə isə meriya onlar üçün yaşayış evləri kirayələyəcək.
Xəsarət alanlarla bağlı danışan Kaxa Kaladze bildirib ki, İnqorokva Klinikasında müalicə alan iki uşağın sağlamlıq vəziyyəti qənaətbəxşdir.
“Dəhşətli faciə baş verdi. Həlak olanların ailə üzvlərinə, yaxınlarına və bütün Gürcüstana başsağlığı vermək istəyirəm. Bütün bunlar çox ağırdır. Xəsarət alanlara gəlincə, iki uşağın sağlamlıq vəziyyəti qənaətbəxşdir. Onlara tezliklə sağalmalarını arzulayıram və ümid edirəm ki, bir neçə gün ərzində evlərinə qayıdacaqlar.
Dünən də bildirdiyim kimi, 28 ailə, ümumilikdə 143 nəfər müvəqqəti olaraq hotelə yerləşdirilib. Əlbəttə, növbəti mərhələdə onların heç bir problemlə üzləşməməsi üçün yaşayış evlərinin kirayəsini təmin edəcəyik.
Son həllə gəlincə, əlbəttə ki, həmin binanın sökülməsi və yeni layihənin həyata keçirilməsi zəruri olacaq. Həmçinin, digər girişlərdə yaşamağa davam edən sakinlər əvəzləmə proqramında iştirak etmək istəsələr, bələdiyyə həmin ərazidə də müvafiq layihəni həyata keçirməyə hazırdır”, – Kaladze bildirib.
Məlumat üçün bildirək ki, noyabrın 19-da Poniçalada yaşayış binasının beşinci mərtəbəsində təbii qazın toplanması nəticəsində partlayış baş verib. Hadisə nəticəsində 6 nəfər ölüb, 5 nəfər yaralanıb.
