Gürcüstan iqtisadiyyatı 2026-cı ilin II rübündə 6,9% böyüyüb

2026-cı ilin II rübündə Gürcüstanın ümumi daxili məhsulunun (ÜDM) həcmi cari qiymətlərlə 28 milyard 147 milyon lari təşkil edib. Ötən ilin eyni dövrü ilə müqayisədə real ÜDM 6,9% artıb.

InterPress.ge xəbər verir ki, bu barədə Gürcüstan Milli Statistika Xidməti (Sakstat) məlumat yayıb. Məlumata görə, 2026-cı ilin II rübündə ÜDM deflyatorunun faiz dəyişimi 3,0% təşkil edib.

2026-cı ilin II rübündə iqtisadi artıma əsas töhfə verən sahələr aşağıdakılar olub:

informasiya və kommunikasiya – 16,6%;

topdan və pərakəndə ticarət, avtomobil və motosikletlərin təmiri – 8,0%;

nəqliyyat və anbar təsərrüfatı – 19,8%;

incəsənət, əyləncə və istirahət – 17,4%;

emal sənayesi – 7,3%;

səhiyyə və sosial xidmətlər – 15,0%.

Azalma istiqamətində isə əsas töhfəni tikinti sahəsi (-4,8%) və kənd, meşə və balıqçılıq təsərrüfatı (-3,5%) verib.

ÜDM-in sahə strukturunda ən böyük pay topdan və pərakəndə ticarət, avtomobil və motosikletlərin təmiri sektoruna məxsus olub – 14,9%. Daşınmaz əmlakla bağlı fəaliyyətlərin payı 9,1%, emal sənayesinin payı 8,9%, informasiya və kommunikasiyanın payı isə 7,6% təşkil edib.

Sonrakı yerlərdə dövlət idarəçiliyi və müdafiə, məcburi sosial təminat (6,5%), tikinti (6,5%), kənd, meşə və balıqçılıq təsərrüfatı (6,4%), təhsil (6,4%), nəqliyyat və anbar təsərrüfatı (6,3%) qərarlaşıb.

Sakstat bildirir ki, ÜDM-in rüblük hesablanması aylıq və rüblük məlumatlar əsasında aparılır. İllik araşdırmaların nəticələri, bir qayda olaraq, rüblük araşdırmaların məlumatlarından fərqlənir. Buna görə də illik araşdırmanın nəticələri nəzərə alınmaqla rüblük ÜDM göstəricilərinin dəqiqləşdirilməsi zərurəti yaranır.

Ötən ilin illik məlumatları əldə edildikdən sonra həmin ilin dörd rübünün göstəricilərinin dəqiqləşdirilməsi ilə yanaşı, cari ilin I və II rüblərinin göstəriciləri də yenidən hesablanır.

Qeyd: 2025-ci ilin illik məlumatları 2026-cı ilin noyabrında əldə edildikdən sonra 2025-ci ilin rüblük göstəriciləri yekun olaraq dəqiqləşdiriləcək. Dəqiqləşdirilmiş məlumatların 2026-cı il noyabrın 13-də dərc olunması nəzərdə tutulur.