Kobaxidze: Konstitusiya Məhkəməsinin qərarını gözləyirik, sonra hamımız rahat nəfəs alacağıq

Gürcüstanın Baş naziri İrakli Kobaxidze bildirib ki, ilk növbədə Gürcüstan Konstitusiya Məhkəməsinin qərarını gözləyirlər və həmin qərardan sonra “hamı birlikdə rahat nəfəs alacaq”.

InterPress.ge xəbər verir ki, baş nazir bu barədə ölkədəki müxalifətin vəziyyətini şərh edərkən bildirib.

Onun sözlərinə görə, müxalifətdə ağır vəziyyət və mürəkkəb proseslər yaşanır, müxalifət daxilindəki qarşıdurmalar isə zəifliyin göstəricisidir.

“Müxalifətdə ağır vəziyyət var və ağır proseslər inkişaf edir. Bütün bunlar zəifliyin əks-sədasıdır. Hər hansı bir orqanizm zəiflədikdə, bunun öz təzahürləri olur və bu halda bir-biri ilə qarşıdurma, təhqirlər də bunun ifadəsidir”, - deyə Kobaxidze bildirib.

Jurnalistin Konstitusiya Məhkəməsinin hakimləri arasında siyasi partiyaların qadağan olunması ilə bağlı iddianın icraata qəbul edilməsinə qarşı çıxan hakimlərin çoxluq təşkil etməsi səbəbindən fikir ayrılığı yaşandığı barədə yayılan məlumatlarla bağlı sualını cavablandıran baş nazir bildirib ki, fikir müxtəlifliyi varsa, bu, sağlam prosesdir.

“Konstitusiya Məhkəməsindəki vəziyyətə gəlincə, bu, bizim işimiz deyil. Əlbəttə, fikir ayrılığı varsa, bu, sağlam prosesdir. İstənilən məhkəmədə bu və ya digər məsələ ilə bağlı hakimlər arasında fərqli mövqelər ola bilər. Lakin bu, tamamilə məhkəmənin işidir və mən sizə orada hansı vəziyyətin olduğunu deyə bilmərəm. Bizim iddiamıza gəlincə, bununla bağlı hər hansı dəyişiklik olarsa, mütləq sizə məlumat verəcəyik”, - deyə baş nazir bildirib.

Qeyd edək ki, hakim “Gürcü Arzusu” partiyası müxalif siyasi birliklərin qeyri-konstitusion elan edilməsi və fəaliyyətlərinin qadağan olunması tələbi ilə ilk dəfə 2025-ci ildə Konstitusiya Məhkəməsinə müraciət edib.

İddia əvvəlcə üç partiyaya – “Birlik – Milli Hərəkat”, “Dəyişikliklər Uğrunda Koalisiya” və “Güclü Gürcüstan”a qarşı yönəlsə də, daha sonra hakim komanda əvvəlki iddianı geri götürərək məhkəməyə yeni, düzəliş edilmiş versiyanı təqdim edib. Yeni iddiada qadağan olunması tələb edilən partiyaların siyahısına “Federalistlər” də əlavə olunub.