Gürcüstanda kənd sakinləri susuzluğa görə etiraz aksiyası keçirib

Gürcüstanın Xobi bələdiyyəsinin Çaladidi kəndində sakinlər içməli suyun olmaması səbəbindən etiraz aksiyası keçiriblər.

InterPress.ge ipn-ə istinadən xəbər verir ki, yerli sakinlərin sözlərinə görə, kənddə su təchizatı problemi bütün yay boyunca davam edib, lakin son üç gündə vəziyyət xüsusilə ağırlaşıb.

Sakinlər bildiriblər ki, susuzluq səbəbindən onların gündəlik həyatında ciddi məhdudiyyətlər yaranıb və hətta ən sadə məişət ehtiyaclarını təmin etməkdə çətinlik çəkirlər.

Yerli sakinlərin məlumatına görə, onlar problemlə bağlı dəfələrlə müvafiq qurumlara, o cümlədən Xobi Bələdiyyəsinin meriyasına və su təchizatı xidmətinə müraciət ediblər. Lakin onların sözlərinə görə, indiyədək nə cavab alıblar, nə də problemin həlli üçün konkret tədbirlər görülüb.