Onkoloji xəstələrlə bağlı videoya sərt reaksiya – Vəfat etmiş yeniyetmənin anası üzr istənilməsini tələb edir

Leykemiya xəstələri ilə bağlı sosial şəbəkələrdə yayılan və bəzi yutuberlərin iştirak etdiyi istehzalı videoya vəfat etmiş onkoloji xəstənin anası Elza Partsvania münasibət bildirib.

InterPress.ge xəbər verir ki, Elza Partsvania sosial şəbəkədə paylaşdığı açıqlamada videoda iştirak edən şəxslərin bütün onkoloji xəstələrdən üzr istəməli olduqlarını bildirib.

Onun sözlərinə görə, 13 yaşlı qızı saçlarını itirmiş vəziyyətdə dünyasını dəyişib və belə bir mövzunun lağ obyektinə çevrilməsi qəbuledilməzdir.

“Kimlərsiniz? Haradan gəlmisiniz? Bu həyat haqqında ümumiyyətlə anlayışınız varmı? Belə ‘zarafatı’ və ya ‘istehzanı’ qətiyyətlə pisləyirəm. Siz mənim 13 yaşlı mələyimin bir tel saçına belə dəyməzsiniz. Sizin insanlığınız utancvericidir. Mən mələk qızımı saçsız vəziyyətdə bu dünyadan yola saldım, bunlar isə bununla bağlı zarafat edirlər. Qızımın və bütün onkoloji xəstələrin qarşısında üzr istəyin. Amma inanıram ki, təəssüf ki, siz nə zarafatın, nə də üzrün dəyərini bilirsiniz”, – deyə Elza Partsvania yazıb.