Gürcüstan–Türkiyə–Azərbaycanın növbəti xarici işlər nazirlərinin görüşü Gürcüstanda keçiriləcək
Gürcüstan, Türkiyə və Azərbaycan xarici işlər nazirlərinin növbəti, 11-ci üçtərəfli görüşü Gürcüstanda baş tutacaq.
InterPress.ge xəbər verir ki, bu barədə Gürcüstan Xarici İşlər Nazirliyi İstanbulda keçirilən Gürcüstan, Türkiyə və Azərbaycan xarici işlər nazirlərinin 10-cu üçtərəfli görüşünün yekunlarına dair yaydığı məlumatda bildirib.
Görüşdə Gürcüstanın xarici işlər naziri Maka Boçorişvili, Türkiyənin xarici işlər naziri Hakan Fidan və Azərbaycanın xarici işlər naziri Ceyhun Bayramov iştirak ediblər.
Nazirliyin məlumatına görə, tərəflər üç ölkə arasında həm ikitərəfli, həm də çoxtərəfli formatlarda mövcud tərəfdaşlıq və əməkdaşlığı qiymətləndiriblər. Siyasi əlaqələr, ticarət, iqtisadiyyat, energetika, əlaqəlilik, kənd təsərrüfatı, nəqliyyat, mədəniyyət və humanitar sahələrdə əməkdaşlıq məsələlərinə xüsusi diqqət ayrılıb.
Bildirilib ki, yüksək səviyyəli siyasi dialoqun və qarşılıqlı səfərlərin intensivliyinin qorunub saxlanılması və daha da inkişaf etdirilməsi vacib hesab olunur.
Tərəflər dostluq, qarşılıqlı anlaşma, suverenlik və ərazi bütövlüyünə hörmət prinsiplərinə əsaslanan əməkdaşlığın geniş spektrini müsbət qiymətləndiriblər. Həmçinin bu prinsiplərin qorunmasının və gücləndirilməsinin əhəmiyyəti vurğulanıb.
Görüş zamanı strateji əhəmiyyət daşıyan birgə tranzit və enerji layihələrinin icrası da müzakirə olunub.
Nazirlər regionun potensialını və üç ölkənin əlaqəlilik baxımından oynadığı rolu nəzərdən keçiriblər. Bu çərçivədə Bakı–Tbilisi–Qars dəmir yolu xəttinin tam gücü ilə fəaliyyət göstərməsinin və Orta Dəhlizin inkişafının əhəmiyyəti xüsusi vurğulanıb.
Tərəflər layihələrin uğurla fəaliyyət göstərməsi üçün koordinasiyalı əməkdaşlığı davam etdirməyə hazır olduqlarını təsdiqləyiblər.
Nazirlər regional prosesləri və təhlükəsizlik çağırışlarını da müzakirə edərək münaqişələrin sülh yolu ilə həllinin və diplomatik kanallardan istifadənin vacibliyini qeyd ediblər.
Üçtərəfli görüşün sonunda nazirlər birgə bəyanat – İstanbul Bəyannaməsini imzalayıblar.
Görüş çərçivəsində Maka Boçorişvili Türkiyənin xarici işlər naziri Hakan Fidan və Azərbaycanın xarici işlər naziri Ceyhun Bayramovla ayrıca ikitərəfli görüşlər də keçirib.
Nazirlik bildirib ki, tərəflər növbəti, 11-ci üçtərəfli nazirlər görüşünün rotasiya prinsipinə uyğun olaraq Gürcüstanda keçirilməsi barədə razılığa gəliblər.
