Baş nazirin hesabatı: Gürcüstanda əhalinin 95 faizi ümumi səhiyyə proqramı ilə əhatə olunub
Hazırda Gürcüstanda əhalinin 95 faizi ümumi səhiyyə proqramından yararlanır.
InterPress.ge xəbər verir ki, bu barədə Baş nazirin parlamentə təqdim etdiyi hökumət proqramının icrası ilə bağlı hesabatda qeyd olunub.
Məlumata görə, proqramın fəaliyyətə başladığı vaxtdan indiyədək 3 milyon vətəndaş üçün 12,5 milyon tibbi xidmət hadisəsi maliyyələşdirilib. Bunun üçün dövlət tərəfindən ümumilikdə 8 milyard lari ayrılıb.
Hesabatda bildirilir ki, son on ildə səhiyyəyə dövlət maliyyəsinin artırılması və xidmətlərin daha səmərəli planlaşdırılması nəticəsində ölkədə orta ömür uzunluğu 72 ildən 75 ilə yüksəlib. Eyni zamanda, uşaq ölümü göstəriciləri də əhəmiyyətli dərəcədə azalıb. Körpə ölümü səviyyəsi 2012-ci ildəki 10,8 göstəricisindən 2025-ci ildə 7,6-ya, beş yaşadək uşaqlar arasında ölüm göstəricisi isə 12,4-dən 9,1-ə enib.
Sənəddə qeyd olunur ki, 2026-cı ilin yanvar ayından etibarən ümumi səhiyyə proqramına yeni xidmətlərin əlavə olunması və ya mövcud xidmətlərin dayandırılması üçün xüsusi meyarlar və şərtlər tətbiq edilməyə başlanıb.
Dərman vasitələrinin əlçatanlığının artırılması məqsədilə referens qiymət mexanizmi də genişləndirilir. Hazırda referens qiymətlər kataloqu 313 aktiv maddə üzrə 7 521 dərman preparatını əhatə edir.
Bundan başqa, birbaşa istehsalçıdan satınalma mexanizmi vasitəsilə 22 adda onkoloji dərman alınıb. Onlardan 17-si patentlə qorunan innovativ və orijinal preparatlardır. Həmçinin axondroplaziya, spinal əzələ atrofiyası və dağınıq sklerozun müalicəsi üçün dərmanlar əldə olunub.
Hesabata əsasən, hesabat dövründə Gürcüstan və xarici ölkələrin klinikalarında 0-21 yaş arasında olan 66 onkoloji xəstə müalicə alıb. Bu məqsədlə 1,2 milyon lari xərclənib.
Uşaq onkologiyası xidmətlərinin gücləndirilməsi istiqamətində İsrail, İspaniya və Türkiyənin klinikaları ilə əməkdaşlıq çərçivəsində 43 azyaşlı xarici tibb müəssisələrində müalicə olunub. Onların müalicəsi üçün 2,1 milyon lari ayrılıb və sağalma göstəricisi 90 faiz təşkil edib.
Hökumət bildirir ki, referal xidmət proqramı vasitəsilə həm Gürcüstanda, həm də xaricdə bahalı tibbi xidmətlərin əlçatanlığı artırılır. Bundan əlavə, Həmrəylik Fondunun ianələri hesabına da onkoloji xəstələrin müalicəsi maliyyələşdirilir.
