Parlament dövlət satınalmaları, turizm və diplomatiya ilə bağlı mühüm dəyişiklikləri qəbul edib
Gürcüstan parlamenti mayın 28-də keçirilən plenar iclasda dövlət satınalmaları, turizm və diplomatik xidmət sahələrini əhatə edən bir sıra qanun dəyişikliklərini qəbul edib.
InterPress.ge xəbər verir ki, parlament hökumətin təşəbbüsü ilə “Dövlət satınalmaları haqqında” qanuna dəyişiklikləri üçüncü oxunuşda təsdiqləyib.
Qəbul olunan layihəyə əsasən, “qara siyahı”ya daxil edilən iqtisadi operatorların dövlət müqavilələrində iştirak hüququ bir ildən iki ilədək məhdudlaşdırılacaq. Qadağa yalnız qayda pozuntusuna yol vermiş iqtisadi operatora deyil, həm də onun təsisçiləri və tərəfdaşlarına şamil olunacaq.
Bununla yanaşı, parlament sürətləndirilmiş qaydada “Turizm haqqında” qanuna dəyişiklikləri də üçüncü oxunuşda 72 səslə qəbul edib.
Layihəni parlamentdə Anton Obolaşvili təqdim edib.
Dəyişikliklərə əsasən, turizm fəaliyyəti ilə məşğul olan subyektlər məlumatların şəffaflığını təmin etmək məqsədilə xüsusi bazada məcburi qeydiyyatdan keçəcəklər. Həmçinin risk daşıyan xidmətlərlə bağlı məsələlər və terminologiya tənzimlənəcək.
Qanun layihəsində cərimə mexanizmləri də yenidən müəyyənləşdirilib və onların ədalətlilik, proporsionallıq və effektivlik prinsiplərinə əsaslandığı bildirilib.
Eyni zamanda, xarici ölkə vətəndaşlarının Gürcüstan ərazisində turist bələdçisi və risk daşıyan xidmətlər göstərməsi ilə bağlı qaydalar hökumət qərarı ilə tənzimlənəcək.
Anton Obolaşvili bildirib ki, turizm ölkə iqtisadiyyatının əsas istiqamətlərindən biridir və qanunvericilik dəyişiklikləri turizmin inkişafına, xidmət keyfiyyətinin artırılmasına və iqtisadi artıma töhfə verəcək.
Parlament həmçinin Diplomatiya Akademiyasının yaradılması barədə qərarı da təsdiqləyib.
“Diplomatik xidmət haqqında” qanuna edilən dəyişikliklərə əsasən, Xarici İşlər Nazirliyinin idarəetmə sahəsində publik hüquqi şəxs statusunda Diplomatiya Akademiyası yaradılacaq.
Akademiya ali təhsil müəssisəsi statusu alacaq və bakalavr, magistr proqramları ilə yanaşı, birillik ixtisasartırma kursları da həyata keçirəcək.
Gürcüstan Xarici İşlər Nazirliyi bildirib ki, Diplomatiya Akademiyasının yaradılması diplomatik xidmət üçün peşəkar kadrların hazırlanmasına kömək edəcək.
