Kobaxidze: 2025-ci ildə 90 min nəfər yoxsulluqdan çıxıb

Gürcüstanın Baş naziri İrakli Kobaxidze bildirib ki, 2025-ci ildə ölkədə yoxsulluq səviyyəsi 7,1 faizə qədər azalıb.

InterPress.ge xəbər verir ki, İrakli Kobaxidze bu barədə bu gün keçirdiyi mətbuat konfransında danışıb. Baş nazirin sözlərinə görə, Gürcüstan Milli Statistika Xidmətinin açıqladığı 2025-ci il göstəricilərinə əsasən, 7,5 faizlik iqtisadi artım fonunda təxminən 90 min vətəndaş yoxsulluğu aradan qaldırıb.

Kobaxidze qeyd edib ki, 2020-ci ildən sonra Gürcüstanda yoxsulluq səviyyəsi üç dəfə azalaraq 21,3 faizdən 7,1 faizə düşüb.

“Bu 5 il ərzində yoxsulluğun orta illik azalması 2,84 faiz bəndi təşkil edib. Xatırladıram ki, 2012-ci ildə yoxsulluq həddindən aşağı yaşayan vətəndaşların sayı 1 milyon 120 mindən çox idi, 2025-ci ildə isə bu göstərici 280 mindən aşağı düşüb”, – deyə Baş nazir bildirib.

Onun sözlərinə görə, Gürcüstanın əsas milli hədəflərindən biri yoxsulluğun tam aradan qaldırılmasıdır.

“280 minə yaxın vətəndaşımız hələ də yoxsulluq həddindən aşağı yaşayırsa, bizim diqqəti azaltmaq haqqımız yoxdur”, – deyə Kobaxidze vurğulayıb.

Baş nazir əlavə edib ki, mövcud yüksək iqtisadi artım və yoxsulluğun azalması tendensiyası davam edərsə, 2030-cu ilə qədər yoxsulluğun tam aradan qaldırılması real görünür.

İrakli Kobaxidzenin sözlərinə görə, 2020-ci ildən sonra Gürcüstan iqtisadiyyatı milli valyuta ilə 50 milyard laridən 105 milyard lariyə, dollar ifadəsində isə 16 milyard dollardan 38 milyard dollara qədər artıb.

“İqtisadi artımın yüksək tempini qorumaq bizim ən vacib vəzifəmizdir. Bu, həm yeni iş yerlərinin yaradılmasına, orta əməkhaqqının artmasına və sosial dəstək imkanlarının genişlənməsinə, həm də yoxsulluğun azalmasına birbaşa təsir göstərir”, – deyə Baş nazir qeyd edib.