ICG: ABŞ və Avropa Gürcüstanda seçki öncəsi neytrallığı pozdu
International Crisis Group (ICG) tərəfindən yayımlanan icmalda qeyd olunur ki, “Gürcü Arzusu” partiyasının liderləri, xüsusilə də partiyanın qurucusu Bidzina İvanişvili uzun müddətdir Qərb paytaxtlarında müxalif siyasətçilərə göstərilən dəstəkdən narazılıq edirlər.
InterPress.ge xəbər verir ki, sənəddə bildirilir ki, hakimiyyət nümayəndələri bu qüvvələri keçmiş prezident Mixeil Saakaşvilinin siyasi varisləri hesab edir və düşünürlər ki, məhz onlar ABŞ və Avropa İttifaqını “Gürcü Arzusu”na qarşı daha aqressiv siyasət yürütməyə sövq edib, partiyanı “prorus” kimi təqdim ediblər.
ICG-in icmalında vurğulanır ki, 2024-cü ilin oktyabrında keçirilən parlament seçkiləri gərginliyi daha da artırıb.
Məqalədə qeyd olunur ki, seçkilər ərəfəsində Avropa və ABŞ rəsmilərinin bəyanatları faktiki olaraq gürcü seçicilərinə “Gürcü Arzusu”na səs verməməyi tövsiyə edib və bununla da Gürcüstanda uzun illər qorunan siyasi favorit göstərməmək praktikasını pozub.
Bundan əlavə, Avropa İttifaqı rəsmilərinin Gürcüstan vətəndaşları üçün Aİ ilə vizasız rejimin dayandırılması ehtimalından danışmağa başladığı qeyd edilir.
Sənədə əsasən, nəticədə “Gürcü Arzusu” seçkilərdə 16 faizlik üstünlüklə qalib gəlib.
“Baxmayaraq ki, müşahidəçilər bu seçkilərdə əvvəlkilərlə müqayisədə daha çox pozuntu qeydə alındığını bildirirdilər, Avropa İttifaqı nümayəndələri daha şəffaf seçkilərin fərqli nəticə verəcəyini sübut edə bilmədiklərini etiraf ediblər”, – deyə icmalda qeyd olunur.
ICG vurğulayır ki, buna baxmayaraq, müxalifət və tənqidi QHT-lər Avropa və ABŞ siyasətçilərini seçki pozuntularını əsas gətirərək “Gürcü Arzusu” hökumətini legitim hakimiyyət kimi tanımamağa çağırıblar.
Məqalədə həmçinin qeyd edilir ki, sərt ritorikaya baxmayaraq, Gürcüstanın xarici siyasəti praktik müstəvidə əsasən dəyişməz qalır.
Sənəddə bildirilir ki, ölkədəki siyasi qarşıdurmanın miqyasına baxmayaraq, Gürcüstanın Rusiya ilə hələ də rəsmi əlaqələri yoxdur və hakimiyyət Moskva ilə münasibətlərin yalnız Rusiyanın Abxaziya və Cənubi Osetiyanın “işğalına” son qoyacağı halda bərpa edilə biləcəyini bildirir.
ICG əlavə edir ki, yüksək səviyyəli təmasların dayanmasına baxmayaraq, Gürcüstan rəsmilərinin Avropa İttifaqı, NATO və ABŞ nümayəndələri ilə işçi səviyyəsində əməkdaşlığı yaxşı vəziyyətdə qalır.
Bundan başqa, Avropa İttifaqının Müşahidə Missiyasının (EUMM) Abxaziya və Cənubi Osetiyanın de-fakto sərhədləri boyunca fəaliyyəti maneəsiz davam edir.
