İrakli Kobaxidze: Xaricdən maliyyələşən QHT-lərin məqsədlərindən biri Gürcüstanda nifrət yaratmaq idi

Gürcüstanın Baş naziri İrakli Kobaxidze bildirib ki, xarici müdaxilənin və xüsusilə xaricdən maliyyələşən QHT-lərin əsas məqsədlərindən biri Gürcüstan daxilində nifrət mühitinin yaradılması olub.

InterPress.ge xəbər verir ki, İrakli Kobaxidze bu barədə Hökumət Administrasiyasında keçirilən brifinqdə jurnalistin sualını cavablandırarkən danışıb.

Baş nazirin sözlərinə görə, söhbət yalnız dövlət institutlarına deyil, həmçinin kilsəyə və digər ictimai institutlara qarşı nifrətin qızışdırılmasından gedir.

“Xarici müdaxilə, o cümlədən QHT-lərin xarici maliyyələşməsi Gürcüstanın siyasi proseslərində açıq şəkildə nifrət yaratmaq xəttini izləyirdi. Məqsəd cəmiyyət daxilində və institutlara qarşı nifrət hissini gücləndirmək idi”, – deyə Kobaxidze bildirib.

Onun sözlərinə görə, bu prosesə qarşı hüquqi mexanizmlərlə mübarizə aparılmalıdır.

“Biz buna hüquqi mexanizmlərlə qarşı çıxmalıyıq. Bu vacibdir ki, heç kim xaricdən gəlib bizə nifrəti sırımasın”, – deyə Baş nazir vurğulayıb.

İrakli Kobaxidze qeyd edib ki, bu məqsədlə hüquq-mühafizə orqanlarının koordinasiyası məsələləri üzrə dövlət naziri və vitse-premyer tərəfindən irəli sürülən yeni təşəbbüs müsbət qiymətləndirilir.

Baş nazir bildirib ki, hökumət yeni yaradılacaq xüsusi idarənin fəaliyyətinə ciddi diqqət yetirəcək.

“Bu, yalnız Gürcüstana xas hadisə deyil. Eyni qüvvələrin yerli proseslərə müdaxilə etməyə çalışdığı bütün ölkələrdə nifrətin eyni üsulla yayılması cəhdlərini görürük. Buna qarşı çox sərt reaksiya lazımdır və məhz buna görə həmin təşəbbüs irəli sürülüb”, – deyə İrakli Kobaxidze qeyd edib.