Gürcüstan və İspaniya hüquq-mühafizə orqanlarının birgə əməliyyatı nəticəsində 13 nəfər saxlanılıb

Gürcüstan və İspaniya Krallığının hüquq-mühafizə orqanlarının əməkdaşları İspaniyada keçirilən beynəlxalq “CACHABA” xüsusi əməliyyatı çərçivəsində 13 nəfəri saxlayıblar.

InterPress.ge xəbər verir ki, bu barədə Gürcüstan Daxili İşlər Nazirliyi məlumat yayıb. Bildirilib ki, polis əməliyyatı Gürcüstan polis attaşesi ilə aktiv əməkdaşlıq şəraitində həyata keçirilib və bundan əvvəl iki ölkənin hüquq-mühafizə orqanları arasında bir il davam edən intensiv koordinasiya aparılıb.

Araşdırma zamanı müəyyən edilib ki, cinayətkar qruplaşmanın üzvləri İspaniyanın müxtəlif regionlarında törədilmiş 27 mənzil oğurluğunda iştirak ediblər. İstintaqla məlum olub ki, qruplaşma iki ayrı qoldan ibarət olub – mənzil oğurluqlarını həyata keçirən gürcü əsilli şəxslərdən və oğurlanmış əşyaların müxtəlif şəhərlərdə satışını təşkil edən ispan qrupundan.

İki ölkənin hüquq-mühafizə əməkdaşları xüsusi əməliyyatı eyni vaxtda Madrid, Valensiya, Quadalaxara və Alikante şəhərlərində, ümumilikdə 9 fərqli ünvanda keçiriblər.

Məlumata görə, istintaq İspaniya Cinayət Məcəlləsinin 510-cu, 301-ci və 570-ci maddələri ilə aparılır. Sözügedən cinayətlər 8 ilədək azadlıqdan məhrumetmə cəzasını nəzərdə tutur.