Datunaşvili: Hakimiyyət yanacağın bahalaşmasına reaksiya vermir

“Güclü Gürcüstan – Lelo” koalisiyasının liderlərindən biri Tazo Datunaşvili ölkədə ərzaq məhsulları, dərman vasitələri və elektrik enerjisinin bahalaşması fonunda yanacaq qiymətlərinin də artdığını bildirib.

InterPress.ge xəbər verir ki, “Güclü Gürcüstan – Lelo” koalisiyasının liderlərindən biri Tazo Datunaşvili keçirdiyi brifinqdə bəyan edib ki, hakimiyyət yanacaq qiymətlərinin artımına reaksiya vermir və hökumət aksiz vergisini azaltmalı, daha sonra isə tamamilə ləğv etməlidir.

Datunaşvilinin sözlərinə görə, Gürcüstanda qiymət artımı böhranı artıq geri dönməz xarakter alıb.

“Təəssüf ki, Gürcüstanda qiymət artımı böhranı geri dönməz olub. Ərzaq məhsulları, dərman vasitələri və elektrik enerjisinin bahalaşması fonunda yanacaq da bahalaşıb və bu proses davam edir. “Gürcü Arzusu” isə buna heç bir reaksiya vermir. Son bir həftə ərzində yanacaq əlavə olaraq 10-30 tetri bahalaşıb, ümumilikdə isə fevralın 28-dən bəri müxtəlif növ yanacağın qiyməti 47 tetridən 1,25 lariyədək artıb.

2012-ci il seçki kampaniyasında İvanişvilinin əsas vədlərindən biri benzinin qiymətini azaltmaq və bu sahədə kartelləri aradan qaldırmaq idi. Hakimiyyətdə 13 ildən sonra bu vəd tam uğursuzluqla nəticələnib. Həmin kampaniyadan 13 il keçib, benzinin qiyməti isə iki dəfədən çox artıb.

Yanacaq qiymətlərinin artımında “Gürcü Arzusu”nun da birbaşa rolu var. Çünki hakimiyyət 2017-ci ildə aksiz vergisini iki dəfə artırdı və bununla yanacağın qiymətini yüksəltdi. Buna görə də hər şeyi yalnız Hörmüz böhranı ilə izah etmək olmaz.

Hazırkı vəziyyətdə dövlətin yeganə çıxış yolu aksiz vergisini ən azı 2017-ci il səviyyəsinə endirmək və müəyyən müddət üçün yanacaq üzərində aksiz vergisini tamamilə ləğv etməkdir. Bu addım vətəndaşların gündəlik nəqliyyat və daşınma xərclərini yüngülləşdirəcək”, – deyə Tazo Datunaşvili bildirib.