Kobaxidze: Zelenski ilə görüş dostluq ruhunda keçdi, mövcud problemlər isə qalır
Gürcüstanın baş naziri İrakli Kobaxidze Ukrayna prezidenti Volodimir Zelenski ilə dünənki görüşün detalları barədə danışa bilməyəcəyini, lakin mövcud problemlərin hələ də qüvvədə qaldığını bildirib.
InterPress.ge xəbər verir ki, bu barədə Kobaxidze jurnalistlərə açıqlamasında qeyd edib.
Onun qeyd etdiyinə görə, mövcud problemlər aradan qalxmayıb və əvvəlki məsələlər, o cümlədən bəyanatlar və səfirin geri çağırılması qərarı qüvvədə qalır.
Baş nazirin sözlərinə görə, görüş əsasən dostluq mühitində keçib və tərəflər əsas diqqəti münasibətlərin gələcəyinə yönəldiblər. O vurğulayıb ki, problemlər mövcud olsa da, əsas məqsəd gələcəyə fokuslanmaqdır.
“Konkret olaraq problemlərin dərin müzakirəsinə girmədik. Şübhəsiz ki, problemlər var idi və onlar aradan qalxmayıb. Lakin biz gələcəyə yönəlməliyik. Mən heç vaxt Zelenskini neqativ kontekstdə xatırlamamışam. Bunun sadə səbəbi var – problemlərə baxmayaraq, Zelenski müharibə şəraitində olan dost ölkənin prezidentidir. Buna görə də mən hər zaman sözlərimdə ehtiyatlı olmuşam. Problemlər qalır, lakin biz gələcəyə yönəlməliyik”, – deyə Kobaxidze bildirib.
Baş nazir əlavə edib ki, görüş qapalı formatda keçirildiyi üçün detalları açıqlamaq mümkün deyil.
“Detallar barədə danışa bilmərəm. Yalnız onu deyə bilərəm ki, söhbət əsasən gələcəyə yönəlmişdi və hər iki tərəfdən dostluq münasibəti hiss olunurdu. Hansı məsələlərin müzakirə olunduğu barədə danışa bilmərəm, çünki görüş qapalı idi. Problemlər isə qalır. Dünəndən sonra bəyanatlar dayandırılıbmı? Səfir geri çağırılmayıbmı? Əlbəttə, problemlər olduğu kimi qalır, lakin biz gələcəyə yönəlməliyik”, – deyə o qeyd edib.
Kobaxidze vurğulayıb ki, Gürcüstan Ukrayna xalqını dəstəkləyir və iki ölkə arasında dostluq münasibətlərinin möhkəmlənməsində maraqlıdır.
Qeyd edək ki, Gürcüstanın baş naziri İrakli Kobaxidze mayın 4-də Avropa Siyasi Birliyinin səkkizinci sammiti çərçivəsində Ukrayna prezidenti Volodimir Zelenski ilə görüşüb. Gürcüstan hökumətinin məlumatına görə, görüş Ukrayna tərəfinin təşəbbüsü ilə baş tutub və tərəflər iki ölkə arasındakı münasibətləri müzakirə ediblər.
Bununla yanaşı, Ukrayna mediası Zelenskinin Ermənistan, Gürcüstan və Slovakiya ilə münasibətlərin bir sıra istiqamətlər üzrə bərpası barədə açıqlama verdiyini bildirib.
Zelenski Gürcüstanın baş naziri ilə görüşünə də münasibət bildirib:
“Uzun müddətdən sonra Gürcüstanın baş naziri ilə üzbəüz qısa söhbətimiz oldu və düşünürəm ki, bu da doğru addımdır”, – deyə Volodimir Zelenski qeyd edib.
