Kobaxidze və Zelenski görüş keçirdi
Gürcüstanın baş naziri İrakli Kobaxidze ilə Ukrayna prezidenti Volodimir Zelenski arasında Avropa Siyasi Birliyinin (EPC) 8-ci sammiti çərçivəsində keçirilən görüşlə bağlı yeni detallar açıqlanıb.
InterPress.ge xəbər verir ki, Ukrayna prezidenti görüşdən sonra sosial şəbəkədə paylaşım edərək bildirib ki, tərəflər arasında dialoqun bütün səviyyələrdə davam etdirilməsi vacibdir.
“Gürcüstanın baş naziri ilə görüş keçirdim. Ölkələrimiz arasında həllini tapmamış məsələlər mövcuddur. Buna baxmayaraq, dialoqun bütün səviyyələrdə davam etdirilməsi vacibdir. Ukrayna hər zaman Gürcüstana, onun suverenliyinə və xalqına hörmət edib və bunu davam etdirəcək. Əməkdaşlığımız gələcəkdə də davam edəcək”, – deyə Zelenski qeyd edib.
Bundan əvvəl İrakli Kobaxidze də jurnalistlərə açıqlamasında bildirib ki, görüş qapalı formatda keçirilib və detalları açıqlamaq mümkün deyil. Onun sözlərinə görə, görüş dostluq və konstruktiv mühitdə baş tutub və əsas müzakirə mövzusu ikitərəfli münasibətlər olub.
Kobaxidze vurğulayıb ki, Ukrayna Gürcüstan üçün dost ölkədir və iki xalq arasında mövcud olan tarixi münasibətlər qorunmalıdır.
Beləliklə, tərəflərin açıqlamaları göstərir ki, müəyyən fikir ayrılıqlarına baxmayaraq, Tbilisi və Kiyev arasında əməkdaşlıq və dialoq davam etdiriləcək.
