İrakli Kobaxidze: Fransada eyni məhsullar Gürcüstanla müqayisədə 50% daha bahadır

Gürcüstanın baş naziri İrakli Kobaxidze bildirib ki, aparılan müqayisələrə əsasən Fransada eyni məhsullar Gürcüstanla müqayisədə orta hesabla 50% daha bahadır.

InterPress.ge xəbər verir ki, bu barədə o, televiziya kanalının efirində çıxışı zamanı danışıb.

Baş nazirin sözlərinə görə, geniş istehlak olunan sosial əhəmiyyətli məhsullar səbəti üzrə aparılan təhlil nəticəsində bu qənaətə gəlinib.

“Qiymətlərə daha dərindən baxdıqda və geniş istehlak olunan məhsullar səbətini müqayisə etdikdə, tam obyektiv şəkildə eyni məhsullar əsasında nəticəyə gəldik ki, Fransada identik məhsullar təxminən 50% daha bahadır. Ümumi mənzərə budur”, – deyə Kobaxidze bildirib.

Onun sözlərinə görə, ümumi mənzərənin əksinə olaraq bəzi konkret məhsullar var ki, Gürcüstanda daha baha satılır. Baş nazir buna nümunə kimi qəhvə və şokolad kremi kimi məhsulları göstərib.

Kobaxidze qeyd edib ki, belə fərqlərin səbəbi distribyutorların monopol mövqeyi və ya mümkün kartel razılaşmaları ola bilər və bu məsələnin əlavə araşdırılmasına ehtiyac var.

Eyni zamanda, o vurğulayıb ki, nominal olaraq qiymətlər Gürcüstanda daha aşağı olsa da, maaş səviyyəsi ilə müqayisədə fərq böyükdür.

Baş nazirin sözlərinə görə, Gürcüstanda orta aylıq əməkhaqqı təxminən 2400 lari olduğu halda, Fransada orta xalis əməkhaqqı təxminən 2680 avro təşkil edir ki, bu da alıcılıq qabiliyyətində ciddi fərq yaradır.