Maka Boçorişvili Aİ səfiri ilə görüşdə: “Brüsselin siyasəti etimadı sarsıdır və tərəfdaşlığa zərər vurur”
Gürcüstanın xarici işlər naziri Maka Boçorişvili Avropa İttifaqının Gürcüstandakı səfiri Pavel Herçinski ilə görüş keçirib.
InterPress.ge xəbər verir ki, Gürcüstan Xarici İşlər Nazirliyinin məlumatına görə, görüş zamanı nazir Brüsselin Gürcüstana münasibətdə hazırkı siyasətini tənqid edib.
Boçorişvilinin sözlərinə görə, Aİ tərəfindən atılan addımlar və səsləndirilən bəyanatlar tərəflər arasında etimadı sarsıdır və Gürcüstan–Aİ tərəfdaşlığına mənfi təsir göstərir.
Bildirilib ki, 27 aprel 2026-cı il tarixində Pavel Herçinski Brüsseldə – Avropa Xarici Fəaliyyət Xidmətində Gürcüstanla bağlı keçirilmiş tədbir və həmin çərçivədə verdiyi bəyanatlarla əlaqədar nazirliyə dəvət olunub.
Nazir görüşdə qeyd edib ki, Brüsselin addımları Gürcü cəmiyyətində parçalanmanı dərinləşdirir və radikal gündəliyi təşviq edir.
Eyni zamanda, Maka Boçorişvili vurğulayıb ki, Gürcüstan hökuməti konstruktiv dialoqa hazırdır və Avropa İttifaqından ədalətli və qarşılıqlı hörmətə əsaslanan yanaşma gözləyir.
