Maka Boçorişvili: Brüsselin Gürcüstana münasibəti dəyişməlidir

Gürcüstanın vitse-premyeri və xarici işlər naziri Maka Boçorişvili Avropa İttifaqının yanaşmasını tənqid edib.

InterPress.ge xəbər verir ki, Boçorişvili jurnalistlərə açıqlamasında bildirib ki, Kaja Kallas tərəfindən Avropa İttifaqı Gürcüstana qarşı “alət kimi istifadə olunur”.

Nazirin sözlərinə görə, Gürcüstan heç vaxt Avropa İttifaqı ilə dialoqdan imtina etməyib və bu, xüsusilə insan hüquqları kimi vacib mövzulara da aiddir.

Boçorişvili vurğulayıb ki, ölkənin əsas kursu milli maraqların qorunması, sülh və sabitliyin təmin olunması, eləcə də iqtisadi inkişafın təşviqinə yönəlib.

Onun sözlərinə görə, Gürcüstan hakimiyyəti xalq tərəfindən seçilib və ölkənin maraqlarına uyğun siyasət həyata keçirir.

Nazir qeyd edib ki, əgər hansısa tərəf mövqeyini dəyişməlidirsə, bu, Brüsseldəki bürokratiyadır.

Qeyd edək ki, Kaja Kallas daha əvvəl Aİ ölkələrinin xarici işlər nazirlərinin görüşündən sonra Gürcüstanda demokratik geriləmənin dayandırılması istiqamətində irəliləyişin görünmədiyini bildirmişdi və ölkənin kursunu dəyişməli olduğunu vurğulamışdı.