Gürcüstan ATƏT-in Təhlükəsizlik üzrə Əməkdaşlıq Forumuna sədrlik etməyə başladı

Gürcüstan beynəlxalq platformada mühüm vəzifə icra etməyə başlayıb.

InterPress.ge xəbər verir ki, ATƏT-in Təhlükəsizlik üzrə Əməkdaşlıq Forumu (FSC) üzrə sədr ölkə Gürcüstan olub. Sədrliyin rəsmi açılışı aprelin 22-də Vyanada keçirilən iclasda baş tutub.

Məlumata görə, Gürcüstanın vitse-premyeri və xarici işlər naziri Maka Boçorişvili çıxışı zamanı regiondakı təhlükəsizlik vəziyyəti, mövcud çağırışlar və ölkənin prioritetləri barədə ətraflı danışıb.

Nazir bildirib ki, ATƏT məkanında təhlükəsizlik mühiti hələ də ciddi narahatlıq doğurur və təcili diqqət tələb edir. Onun sözlərinə görə, müasir təhlükələr artıq ənənəvi təhlükəsizlik çərçivələrini aşır və bu səbəbdən forum çərçivəsində əməkdaşlıq və innovativ yanaşmalar gücləndirilməlidir.

Boçorişvili vurğulayıb ki, Gürcüstan üçün əsas prioritetlərdən biri dövlətlər arasında etimadın bərpası və razılaşdırılmış prinsiplərə hörmətin gücləndirilməsidir.

O, həmçinin qeyd edib ki, Gürcüstan öz təcrübəsinə əsaslanaraq, həll olunmamış münaqişələrin və suverenliyin pozulmasının nəticələrini yaxşı bilir və bu kontekstdə Rusiyanın Gürcüstanın iki regionunu işğal altında saxladığını xatırladıb.

Nazir forum çərçivəsində Gürcüstanın üç əsas prioritet istiqamətini təqdim edib:

• davranış kodeksinin gücləndirilməsi,

• silahlı münaqişələrin qadın və qızlara təsiri,

• münaqişələr zamanı insan hüquqlarının pozulması.

Sonda Boçorişvili bildirib ki, Gürcüstan 2027-ci ildə ATƏT-ə sədrliyə namizədliyini də irəli sürüb.

Qeyd edək ki, Təhlükəsizlik üzrə Əməkdaşlıq Forumunda sədrliyin rotasiyası ildə üç dəfə dəyişir və Gürcüstan bu vəzifəni 2026-cı ilin sentyabrına qədər icra edəcək.