Marneulidə genişmiqyaslı xüsusi əməliyyat keçirildi - VİDEO

Marneulidə baş verən insidentlə əlaqədar hüquq-mühafizə orqanları tərəfindən genişmiqyaslı əməliyyat keçirilib.

InterPress.ge xəbər verir ki, Daxili İşlər Nazirliyinin məlumatına əsasən, Kvemo Kartli Polisi və Xüsusi Təyinatlılar Departamentinin əməkdaşları məhkəmə qərarı əsasında 11 nəfəri saxlayıb.

Məlumata görə, daha bir şəxsə sağlamlığa qəsdən ağır zərər vurma maddəsi ilə qiyabi ittiham irəli sürülüb və onun barəsində axtarış elan ediləcək.

İstintaqla müəyyən edilib ki, Marneulidə tərəflər arasında yaranan mübahisə fiziki qarşıdurmaya çevrilib. Saxlanılan şəxslər ictimai asayişi kobud şəkildə pozublar və qarşıdurma zamanı iştirakçılardan biri soyuq silahdan istifadə edərək 1994-cü il təvəllüdlü B.A.-ya ağır xəsarət yetirib.

Qurumun məlumatına görə, hadisənin şahidi olan 7 nəfər istintaqla əməkdaşlıq etməyib və hüquq-mühafizə orqanlarına yalan ifadə verib.

Faktla bağlı araşdırma Cinayət Məcəlləsinin 117-ci (ağır bədən xəsarəti yetirmə), 239-cu (xuliqanlıq) və 370-ci (yalan ifadə vermə) maddələri ilə aparılır ki, bu da 7 ilədək azadlıqdan məhrumetmə cəzasını nəzərdə tutur.