Xaricdə alınmış təhsilin tanınması artıq məktəblərin səlahiyyətində olacaq

Gürcüstanda xaricdə alınmış ümumi təhsilin tanınması prosesi dəyişdirilir və bu səlahiyyət artıq məktəblərə veriləcək.

InterPress.ge xəbər verir ki, bu barədə Təhsil və Elm Nazirliyi parlamentə “Ümumi təhsil haqqında” qanuna dəyişikliklərlə bağlı layihə təqdim edib.

Məlumata görə, yeni qaydalara əsasən, xaricdə təhsil almış şəxslərin təhsilinin tanınması artıq Təhsilin Keyfiyyətinin İnkişafı üzrə Milli Mərkəzin deyil, birbaşa ümumtəhsil müəssisələrinin öhdəliyi olacaq və bu proses nazirin əmri ilə müəyyən edilən qaydalar əsasında həyata keçiriləcək.

Dəyişikliklərə əsasən, xaricdə tanınmış ümumtəhsil proqramı çərçivəsində əldə olunan sənədlərin bazis təhsili təsdiq edən sənədlərlə bərabərləşdirilməsi də mümkün olacaq.

Eyni zamanda qanuna yeni maddə əlavə edilir ki, Gürcüstanda xaricdə tanınmış təhsil proqramlarını həyata keçirən hüquqi şəxslər məcburi akkreditasiyadan keçməli olacaq və bu akkreditasiya onların fəaliyyət göstərdiyi təhsil pilləsinə uyğun olmalıdır.

Layihəyə görə, bu proqramlarda təhsil alan şagirdlər qanunvericiliyə uyğun şəkildə təhsil müəssisələri arasında köçürülmə (mobillik) hüququndan da istifadə edə biləcəklər.

Hazırda qüvvədə olan qanuna əsasən, xaricdə alınmış təhsilin tanınması Təhsilin Keyfiyyətinin İnkişafı üzrə Milli Mərkəz tərəfindən həyata keçirilir. Lakin nazirlik bildirir ki, beynəlxalq təcrübədə bu səlahiyyət əsasən məktəblərə verilir və mərkəzin bu prosesdə iştirakı uyğun hesab edilmir.

Qeyd olunur ki, bir sıra ölkələrdə – o cümlədən Niderland, Almaniya, ABŞ, Fransa və digər dövlətlərdə bu proses birbaşa təhsil müəssisələri tərəfindən həyata keçirilir.

Nazirliyin izahına görə, Gürcüstan Konstitusiyasına əsasən ibtidai və əsas təhsil məcburidir və hər bir şəxs təhsil almaq hüququna malikdir. Buna görə də, tanınma ilə bağlı qərardan asılı olmayaraq, şagirdin təhsilini davam etdirmək hüququ qorunur.