İran ordusu: Hörmüz boğazı üzərində nəzarəti verməyəcəyik

İranın silahlı qüvvələri bəyan edib ki, Hörmüz boğazı üzərində nəzarəti heç bir halda itirməyəcək.

InterPress.ge xəbər verir ki, bu barədə məlumatı İran dövlət mediası yayıb.

Bəyanatda qeyd olunur ki, İran Hörmüz boğazının idarə olunmasını yeni səviyyəyə qaldıracaq, bu ərazi üzərində nəzarəti qoruyacaq və “qanuni hüquqlarından” imtina etməyəcək.

İran hərbi rəhbərliyi əlavə edib ki, əgər Hizbullah və Livan xalqına qarşı hücumlar dayandırılmasa, Tehran “dağıdıcı və ağrılı cavab” verəcək.

“Silahlı qüvvələrimiz istənilən təhlükəyə qarşı tam hazırdır və barmağımız tətikdədir”, – deyə bəyanatda vurğulanıb.

Eyni zamanda, açıqlamada ABŞ prezidenti Donald Tramp və İsrailin baş naziri Benyamin Netanyahu ünvanlanaraq bildirilib ki, onlar “utancverici məğlubiyyətlərini” nəzərdən keçirməli və İran xalqına qarşı təhdidlərdən çəkinməlidirlər.