Artemis II missiyası uğurla başa çatdı – ekipaj Yerə qayıtdı

NASA Artemis II missiyasının ekipajının Yerə uğurla qayıtdığını açıqlayıb.

InterPress.ge xəbər verir ki, missiya Ay ətrafında səyahəti başa vurduqdan sonra Tbilisi vaxtı ilə saat 04:07-də Sakit okeanda, San Dieqo sahilləri yaxınlığında uğurla eniş edib.

Ekipaj üzvləri – Reid Uaysmen, Viktor Qlover, Kristina Kox və Ceremi Hansen – 10 günlük missiya çərçivəsində Yer kürəsindən 252 756 mil uzaqlığa qədər məsafə qət ediblər. Bununla da onlar 56 il əvvəl Apollo 13 tərəfindən müəyyən edilmiş rekordu yeniləyiblər.

Yerə qayıtdıqdan sonra astronavtlar tibbi müayinədən keçmək üçün ABŞ Hərbi Dəniz Qüvvələrinə məxsus USS John P. Murtha gəmisinə aparılıblar. Missiyanın komandiri Reid Uaysmen bildirib ki, ekipaj üzvlərinin hamısı özlərini yaxşı hiss edir.

NASA rəhbəri Cared Ayzekmen isə qeyd edib ki, Ay missiyaları davam edəcək və məqsəd 2028-ci ilə qədər Ay səthinə eniş etməkdir.

Onun sözlərinə görə, Artemis II missiyasının tamamlanmasından sonra əsas diqqət Artemis III layihəsinə yönələcək və gələcəkdə Ayda baza qurulması planlaşdırılır.