Giorgi Vaşadze: Bu gündən proses başlayır, birlikdə qələbəyə nail olacağıq

“Hamımız üçün qələbəyə nail olacağıq, bu gündən proses başlayır”.

InterPress.ge xəbər verir ki, bu barədə Giorgi Vaşadze müxalif partiyaların görüşündən sonra jurnalistlərə açıqlamasında bildirib.

Görüşdə tərəflər yekun razılığa gələrək “Müxalifət alyansı”nın yaradılması barədə razılaşıblar.

Strategiya Ağaşenebeli partiyasının lideri qeyd edib ki, bu gün “hamının birləşməsi istiqamətində atılmış ilk strateji addımdır”.

“‘Müxalifət alyansı’ formalaşıb. Bu, çox, çox önəmlidir. Mesajımız birlik, razılaşma, birgə dayanmaq, ölkəni ayağa qaldırmaq və real iş görməkdir. Bunun üçün çox zəhmət lazımdır və bugünkü günü hamımızın birləşməsi istiqamətində ilk strateji addım hesab etməliyik. Hər şey yaxşıdır. Əminik ki, cəmiyyətlə birlikdə yekunda qələbəyə nail olacağıq”, – deyə Vaşadze bildirib.

Xatırladaq ki, müxalif partiyaların bir hissəsi arasında “Müxalifət alyansı” yaradılıb. Sənədi Koalisiya Dəyişiklik üçün - Girçi Daha Çox Azadlıq, Droa, Axali, Vahid Milli Hərəkat, Strategiya Ağaşenebeli, Federalistlər, Milli-Demokrat Partiyası, Avropa Gürcüstanı və Azadlıq Meydanı imzalayıb.

İmzacı müxalif qüvvələr ümumi strategiya və birgə fəaliyyət qaydaları üzərində razılığa gəldiklərini bəyan edərək bildiriblər ki, birgə səylərlə Gürcüstanı Bidzina İvanişvilinin “avtoritar rejimi”ndən azad edəcək, ölkənin Avro-Atlantik kursunu bərpa edəcək və demokratik idarəçiliyi təmin edəcəklər.

Razılaşma bir sıra prinsiplərə əsaslanır. Onlardan biri “eyni düşüncə olmadan birlik” prinsipidir. Sənədə əsasən, alyansın təsisçi partiyaları ideoloji kimliklərini qoruyurlar, lakin vahid etiraz fəaliyyəti və kommunikasiya strategiyası üzrə razılığa gəlirlər.

Bundan əlavə, tərəflər imzalayan subyektlər arasında münasibətləri tənzimləyən və qaydaların pozulmasına görə məsuliyyəti müəyyən edən davranış kodeksi üzərində də razılaşıblar.

“Müxalifət alyansı” siyasi məhbusların azad olunmasına və azad, ədalətli seçkilərdə qələbəyə qədər mübarizə aparacağına söz verib.