İran XİN rəhbəri: Silahlı qüvvələrimiz istənilən təcavüzə dərhal və sərt cavab verməyə hazırdır

Ölkənin silahlı qüvvələri istənilən təcavüzə dərhal və qətiyyətlə cavab verməyə tam hazırdır.

InterPress.ge xəbər verir ki, bu barədə İranın xarici işlər naziri Abbas Araqçi sosial platforma X-də paylaşım edərək bildirib.

“Bizim cəsur silahlı qüvvələrimiz hazır vəziyyətdədir – barmaqları tətikdədir – sevimli torpağımıza, dənizimizə və hava məkanımıza qarşı yönələn istənilən təcavüzə dərhal və güclü cavab vermək üçün”, – deyə Araqçi qeyd edib.

Nazirin sözlərinə görə, “12 günlük müharibədən” çıxarılan mühüm dərslər İrana mümkün hücumlara daha güclü, daha sürətli və daha əsaslı şəkildə cavab vermək imkanı yaradıb.

Araqçi vurğulayıb ki, İran hər zaman qarşılıqlı faydalı, ədalətli və bərabərhüquqlu nüvə sazişini dəstəkləyir və ölkənin heç vaxt nüvə silahı əldə etmək niyyəti olmayıb.

“Eyni zamanda, İran məcburiyyət, təhdid və qorxutma olmadan, bərabərlik prinsiplərinə əsaslanan, İrana dinc məqsədlər üçün nüvə texnologiyasından istifadə hüququnu təmin edən və nüvə silahının mövcudluğunu istisna edən ədalətli və qarşılıqlı faydalı nüvə sazişini hər zaman alqışlayır. Nüvə silahının bizim təhlükəsizlik doktrinamızda yeri yoxdur və biz heç vaxt belə bir silah əldə etməyə çalışmamışıq”, – deyə İranın xarici işlər naziri bildirib.