Tramp Fed-in yeni sədri postu üçün BlackRock-un yüksək vəzifəli rəhbəri ilə görüşəcək

 

ABŞ Prezidenti Donald Tramp bu həftə BlackRock şirkətinin qlobal sabit gəlir istiqaməti üzrə baş investisiya direktoru Rik Riderlə görüşəcək. Görüşün məqsədi onun Federal Ehtiyat Sisteminin (Fed) yeni sədri vəzifəsinə mümkün namizəd kimi qiymətləndirilməsidir.

InterPress.ge xəbər verir ki, bu barədə Fox Business öz mənbələrinə istinadən məlumat yayıb.

Mənbələrin bildirdiyinə görə, Rik Riderlə müsahibə cümə axşamı Ağ Evdə keçiriləcək. Görüşdə Donald Trampla yanaşı, administrasiya rəhbəri Suzi Uayls, maliyyə naziri Skott Bessent və administrasiya rəhbərinin müavini Den Skavino da iştirak edəcək.

Məlumata görə, bu, Fed-in hazırkı sədri Cerom Pauelin yerinə namizəd kimi nəzərdən keçirilən şəxslərlə keçirilən dördüncü və sonuncu görüş olacaq. Cerom Pauelin səlahiyyət müddəti 15 mayda başa çatır.

Fox Business-in yazdığına görə, Donald Tramp Fed-in yeni sədrinin kim olacağı ilə bağlı qərarı yanvar ayında verəcək.