Gürcüstanda hava kəskin dəyişəcək: güclü qar, fırtına və yolların bağlanması riski

13 yanvar tarixində Gürcüstan ərazisində vaxtaşırı yağıntı gözlənilir, bəzi bölgələrdə intensiv olacaq, dağlıq ərazilərdə isə yağıntı qar şəklində düşəcək.

InterPress.ge xəbər verir ki, bu barədə Gürcüstanın Ətraf Mühit üzrə Milli Agentliyi məlumat verib.

Agentliyin bildirdiyinə əsasən, 14 yanvar tarixində ölkənin böyük hissəsində qar yağacağı, bəzi yerlərdə güclü qar, qərb küləklərinin güclənməsi və dənizdə 4–5 ballıq fırtına müşahidə olunacağı proqnozlaşdırılır.

Dağlıq rayonlarda duman, çovğun, elektrik ötürücü xətlərdə buzlanma, yollarda sürüşkənlik və qar uçqunu təhlükəsi gözlənilir.

Qeyd olunub ki, güclü qar, çovğun, görünüş məsafəsinin azalması, buzlanma və uçqun təhlükəsi səbəbindən avtomobil yollarının bəzi hissələrində nəqliyyatın hərəkəti məhdudlaşdırıla bilər. Gözlənilən yağıntılar Qərbi Gürcüstan çaylarında suyun səviyyəsinin artmasına, təpəlik və dağlıq zonalarda isə torpaq sürüşməsi və sel proseslərinin yaranmasına və aktivləşməsinə səbəb ola bilər. Təhlükə səviyyəsi orta olaraq qiymətləndirilir.