Gia Volski: Qanuna əsasən, hər kəs – o cümlədən qeydiyyatını xaricə köçürənlər də – ölkə və cəmiyyət qarşısında hesabat verməlidir

"Qanuna əsasən hər kəs ölkə və cəmiyyət qarşısında hesabat verməlidir."

InterPress.ge xəbər verir ki,bu barədə parlament sədrinin birinci müavini Giorgi Volski qeyri-hökumət təşkilatlarına Avropa Komissiyası tərəfindən 8 milyard avro ayrılması ilə bağlı qərara münasibət bildirərək qeyd edib.

Onun sözlərinə görə, bu tələb yalnız ölkə daxilində fəaliyyət göstərən qurumlara deyil, hesablarını və qeydiyyatlarını xaricə köçürənlərə də şamil olunur.

Volski vurğulayıb ki, hökumətin proqramların maliyyələşdirilməsinə, o cümlədən qeyri-hökumət təşkilatları vasitəsilə həyata keçirilən layihələrə qarşı heç bir etirazı yoxdur, əksinə, bu cür dəstəyi alqışlayırlar. O xatırladıb ki, şəffaflıq qanununa əsasən artıq 600-dən çox, hətta daha artıq QHT qeydiyyatdan keçib. Onun sözlərinə görə, “FARA” qanunu çərçivəsində hər kəs ölkəyə daxil olan vəsaitlər və onların xərclənməsi barədə hesabat təqdim etməlidir.

Parlament sədrinin müavini bildirib ki, cəmiyyət ölkəyə nə qədər vəsait daxil olduğunu və bu vəsaitin hansı məqsədlərlə xərcləndiyini bilməlidir, əks halda söhbət “qara pul”dan gedir. Marta Kos və “Gürcüstanı sevməyən digər şəxslərin” tənqidlərinə toxunan Volski qeyd edib ki, bu cür bəyanatlara baxmayaraq, dövlət inkişaf etmiş demokratiyalarda adi standart sayılan qanunlar vasitəsilə ölkəyə qara pulun gətirilməsi cəhdlərinin qarşısını almaqda qərarlıdır.

“Biz bu prinsip üzərində dayanmışıq və Marta Kosun və ya Gürcüstanı sevməyən digər şəxslərin tənqidlərinə baxmayaraq, geri çəkilməyəcəyik. Sistem var, qanun var və bu qanuna Avropa İttifaqının istənilən ölkəsində olduğu kimi əməl edilməlidir. Cəmiyyət bilməlidir ki, ölkəyə nə qədər vəsait daxil olur və hara xərclənir. Əks halda, bu, qara puldur. Marta Kosun bəyanatı sarsıdıcıdır, çünki bizə deyilir ki, guya qara pul gətirilməlidir və qeyri-hökumət təşkilatları nəzarətsiz şəkildə maliyyələşdirilməlidir. Bu problemdir, lakin biz bu problemlə inkişaf etmiş demokratiyalarda qəbul olunmuş sistem və qanunlar vasitəsilə mübarizə aparacağıq. Heç kim ekstremizmin inkişafına yönəlmiş vəsaiti ölkəyə gətirməyə cəhd etməsin. Təəssüf ki, biz bu cür halları Tbilisi küçələrində görmüşük və indi də istisna olunmur ki, bu vəsaitlər məhz bu məqsədlə koordinasiya olunur. USAID bu dağıdıcı ssenarinin maliyyələşdirilməsini dayandırdıqdan sonra, Ukraynada mövcud vəziyyət fonunda bu yükü Avropa İttifaqı öz üzərinə götürdü”, – deyə Giorgi Volski bildirib.