Sorğu: Fransızların 60 faizdən çoxu ölkədəki vəziyyətdən narahatdır

Fransada aparılan sorğunun nəticələrinə görə, respondentlərin 60 faizdən çoxu siyasi baxışlarından asılı olmayaraq, ölkədəki ümumi vəziyyəti “narahatlıq” sözü ilə xarakterizə edir.

InterPress.ge xəbər verir ki, bu barədə Fransanın BFMTV telekanalı məlumat yayıb.

Məlumata əsasən, sosioloji Elabe şirkətinin araşdırmasına görə, “narahatlıq” hazırda fransız cəmiyyəti üçün əsas açar anlayış kimi ön plana çıxır. Sorğu iştirakçıları ölkədə baş verən proseslər fonunda özlərini eyni zamanda əsəbi, qəzəbli və yorğun hiss etdiklərini bildiriblər.

Araşdırmanın nəticələri göstərir ki, vətəndaşların fikrincə, hökumətin prioritet istiqaməti ilk növbədə əhalinin alıcılıq qabiliyyətinin artırılması olmalıdır. Respondentlərin əhəmiyyətli hissəsi təhlükəsizlik və narkotik alveri ilə mübarizənin gücləndirilməsini, dövlət borcunun azaldılmasını və səhiyyə sisteminin yaxşılaşdırılmasını da əsas problemlər sırasında qeyd edib.

Bununla yanaşı, sorğuda iştirak edənlərin 35 faizi siyasi qeyri-sabitlikdən, 33 faizi isə immiqrasiyanın artmasından narahat olduğunu ifadə edib. Ümumilikdə, Fransa əhalisinin 46 faizi 2026-cı ilin ötən ildən daha pis olacağını düşünür. Bu kontekstdə respondentlərin 52 faizi isə 2027-ci il prezident seçkilərinə qədər ölkədə ciddi dəyişikliklərə ehtiyac olduğunu bildirib.

Qeyd edək ki, sorğu 2–3 yanvar tarixlərində onlayn formatda min nəfər yetkin Fransa vətəndaşı arasında keçirilib. Araşdırmanın mümkün statistik səhv həddi açıqlanmayıb.