Avropa Komissiyası: Gürcüstan vizasız rejimi tamamilə itirə bilər
"Gürcüstanın nəticə etibarilə vizasız rejim statusunu tamamilə itirməsi mümkündür."
InterPress.ge xəbər verir ki, bu barədə Avropa Komissiyasının vizasız gediş-gəlişin dayandırılması mexanizmi üzrə səkkizinci hesabatında bildirilir.
Hesabatda qeyd olunur ki, Avropa Komissiyası Gürcüstanın idarəetmə və qanunun aliliyinə dair əsas tələblər üzrə ciddi geriləmə yaşadığını müəyyən edib. Məhz bu tələblər vizasız rejimin verilməsinin əsasını təşkil edir.
Sənəddə vurğulanır ki, Gürcüstanda həmçinin viza uyğunluğu və korrupsiyaya qarşı mübarizə sahələrində də geriləmə müşahidə olunub. Avropa Komissiyasının qiymətləndirməsinə görə, mövcud vəziyyət vizaliberallaşma prosesi çərçivəsində götürülmüş öhdəliklərdən geri çəkilmənin açıq nümunəsidir və vizasız rejimin əsaslandığı qarşılıqlı etimadı sarsıdır.
Komissiya bildirir ki, geriləmənin sistemli və məqsədli xarakterini nəzərə alaraq, yenilənmiş vizasız rejimin dayandırılması mexanizmi çərçivəsində müvafiq tədbirlərin görülməsi nəzərdən keçirilir. Yeni qaydalara əsasən, ilk mərhələdə vizasız gediş-gəlişin dayandırılması Gürcüstan hökuməti tərəfindən verilmiş diplomatik, xidməti və rəsmi pasport sahiblərinə şamil oluna bilər. Məhz bu şəxslər Avropa Komissiyasının tövsiyələrinin icra olunmamasına görə əsas məsul şəxslər hesab edilir.
İkinci mərhələdə isə problemlər Gürcüstan hökuməti tərəfindən aradan qaldırılmadığı təqdirdə, vizasız rejimin dayandırılması bütün əhalini əhatə edə bilər. Nəticə etibarilə, Gürcüstan vizasız rejim statusunu tam itirə və viza rejimi tətbiq olunan üçüncü ölkələrin siyahısına daxil edilə bilər.
Hesabatda qeyd olunur ki, 2025-ci il iyulun 14-də Avropa Komissiyası Gürcüstan hökumətinə rəsmi məktub göndərərək vizaliberallaşma tələblərinin icrasının davam etdirilməsi və mexanizmin yeddinci hesabatında yer alan tövsiyələrin yerinə yetirilməsi barədə ətraflı məlumat tələb edib. Lakin Komissiya Gürcüstan tərəfindən bu tövsiyələrin icrasında hər hansı ciddi irəliləyiş barədə məlumat əldə etmədiyini bildirir. Əksər hallarda düzəldici tədbirlər görülməyib, bəzi hallarda isə vəziyyət daha da pisləşib.
Avropa Komissiyasının narahatlığı Gürcüstanda qəbul edilmiş bir sıra qanunvericilik aktları ilə əlaqələndirilir. Bunlara xarici təsirin şəffaflığı haqqında qanun, ailə dəyərləri və yetkinlik yaşına çatmayanların müdafiəsi haqqında qanun, xarici agentlərin qeydiyyatı aktı, eləcə də qrantlar haqqında qanuna, vətəndaşların siyasi toplaşma hüququna dair qanuna, inzibati xətalar məcəlləsinə, yayım haqqında qanuna və cinayət məcəlləsinə edilmiş dəyişikliklər daxildir.
Avropa Komissiyasının fikrincə, bu qanunlar və dəyişikliklər fundamental hüquq və azadlıqları məhdudlaşdırır, həmçinin Gürcüstanın Avropa və digər beynəlxalq öhdəliklərinə ziddir. Bildirilir ki, Gürcüstan hökuməti bu aktlara düzəlişlər etmək əvəzinə, onları milli suverenlik arqumenti ilə açıq şəkildə müdafiə etməyə başlayıb və vizaliberallaşma dialoqu zamanı götürülmüş öhdəlikləri faktiki olaraq nəzərə almayıb.
