Avropa Parlamentinin deputatı: Gürcüstan hökumətinin müstəqil araşdırmadan qorxması həqiqətdən və cəzadan çəkindiklərini göstərir

"Gürcüstan hökumətinin müstəqil araşdırmadan çəkinməsi yalnız onların həqiqətdən və məsuliyyətdən qorxduğunu göstərir".

InterPress.ge xəbər verir ki, bu barədə Avropa Parlamentinin deputatı Rasa Yukneviçiene Avropa Parlamentində çıxışı zamanı bildirib.

O, çıxışının əvvəlində Saxarov Mükafatının iki həbsdə olan jurnalistə verilməsi istiqamətində əməyi olan həmkarlarına təşəkkür edib. Deputat bildirib ki, Andjey Poçobut və Mziya Amaqlobeli arasında minlərlə kilometr məsafə olsa da, onların azadlıq uğrunda mübarizəsi mahiyyət etibarilə eynidir.

Rasa Yukneviçienenin sözlərinə görə, Belarus və Gürcüstanda baş verən proseslər demokratik seçkilərlə başlayıb. İlk mərhələdə media, xüsusilə də milli yayımçılar repressiyalara məruz qalıb. O vurğulayıb ki, jurnalistlərin həbsə düşdüyü günə qədər bu ölkələrin keçdiyi yolun təhlili son dərəcə vacibdir, çünki Avropa demokratiyaları da hücum altındadır.

Avropa Parlamentinin deputatı qeyd edib ki, Saxarov Mükafatı Aleksandr Lukaşenko və Bidzina İvanişvilinin həbsxanalarında saxlanılan bütün vicdan və azadlıq məhbuslarına ünvanlanıb. Onun sözlərinə görə, Avropa Parlamenti bu insanlara açıq mesaj göndərib ki, onlar tək deyillər, görünürlər və Avropa Parlamenti onların mübarizəsini dəstəkləməyə çalışır.

Yukneviçiene çıxışında Gürcüstandakı vəziyyətin daha da pisləşdiyini bildirib və BBC-nin son araşdırmasına diqqət çəkib. Həmin araşdırmada 2024-cü ildə etirazların dağıdılması zamanı Birinci Dünya Müharibəsindən qalma kimyəvi maddələrin istifadə edildiyi iddia olunur. Bildirilib ki, bu maddələr su şırnaqlarına qatılıb. Avropa Parlamentinin deputatı bu faktların araşdırılmasının vacib olduğunu vurğulayaraq, Avropa Komissiyasını və Avropa Şurasını beynəlxalq, müstəqil araşdırmanın başlanmasına çağırıb.

Onun sözlərinə görə, Gürcüstan hökumətinin müstəqil araşdırmadan qorxması BBC-nin ortaya qoyduğu faktların böyük ehtimalla doğru olduğunu göstərir. Rasa Yukneviçiene bildirib ki, mübarizə aparan gürcü xalqına dəstək verilməlidir, çünki Gürcüstan Avropanın bir hissəsidir.