Avropa Şurasının Baş katibi: Gürcüstanın konvensiyanı imzalaması çox müsbət addımdır

"Gürcüstan uzun illərdir Avropa Şurasının üzvüdür və bu gün səhər Ukrayna üzrə Beynəlxalq Şikayətlər Komissiyasını təsis edən konvensiyanın imzalanmasında iştirak edib."

InterPress.ge xəbər verir ki, bu barədə Avropa Şurasının Baş katibi Alen Bersen bildirib.

Onun sözlərinə görə, bu, olduqca müsbət bir elementdir, eyni zamanda Avropa Şurasının üzv dövləti kimi Gürcüstanla birgə əməkdaşlıqda irəliləyişə ehtiyac var.

Alen Bersen qeyd edib ki, Avropa Şurasına üzv ölkələrin bir-birinə daha da yaxınlaşması vacibdir.

“Bildiyiniz kimi, Avropa Şurasının üzvləri olaraq biz mütəmadi təmasdayıq və dəyərlər və öhdəliklər baxımından yenidən yaxınlaşma yollarını tapmaq önəmlidir. Məhz bizi vahid qitəyə çevirən fundamental prinsiplər əsasında Avropa Şurasının 46 üzv dövləti ilə birlikdə”, – deyə Baş katib vurğulayıb.

Xatırladaq ki, Gürcüstan Ukrayna üçün Beynəlxalq Şikayətlər Komissiyasını təsis edən konvensiyaya qoşulub. Sözügedən Komissiya Rusiya Federasiyası tərəfindən 2022-ci il 24 fevral tarixindən etibarən Ukraynada və ya Ukraynaya qarşı törədilmiş beynəlxalq səviyyədə tanınan qanunsuz əməllər nəticəsində dəymiş zərər, itki və ziyanın kompensasiyası ilə bağlı müraciətləri nəzərdən keçirəcək.