“Juventus” klubunun məşqçisini avtomobil vurub – sürücü hadisə yerindən qaçıb

Tsalenjixa “Juventus” futbol klubunun məşqçisi ağır yol-nəqliyyat hadisəsinin qurbanı olub.

InterPress.ge xəbər verir ki, məlumatı şəhərin keçmiş mer müavini Tamar Belkania sosial şəbəkədə yayıb.

Onun sözlərinə görə, gənc kişi – məşqçi Levan Kvaratsxelia stadionun yaxınlığında avtomobil tərəfindən vurulub, daha sonra yolun kənarındakı xəndəyə düşüb və təxminən yarım saat ərzində huşsuz vəziyyətdə qan itirərək qalıb. O, gicgah sümüyünün sınığı diaqnozu ilə xəstəxanaya yerləşdirilib və yaxın saatlarda əməliyyat olunacaq.

Belkania qeyd edib ki, sürücü hadisə yerindən qaçıb. Daha sonra yayılan məlumatlara əsasən, şübhəli şəxs polis tərəfindən saxlanılıb. Qeyri-rəsmi məlumatlara görə, sürücü hadisə zamanı alkoholun təsiri altında olub.

Sosial şəbəkədə yayılan paylaşımda Levan Kvaratsxeliyanın vəziyyətinə görə narahatlıq ifadə olunub və onun “çempionlar yetişdirən, çox dəyərli insan” olduğu vurğulanıb.

Paylaşımda həmçinin sərxoş halda sükan arxasına keçməyin qəbuledilməz olduğu xüsusi olaraq qeyd edilir:

“Sükan arxasına sərxoş oturmayın – bu, potensial qatil olmaq deməkdir.”