“Bokuçava: İvanişvili bir il əvvəl açıq şəkildə göstərdi ki, onun rejimində Gürcüstanın Avropa gələcəyi yoxdur”

"Bidzina İvanişvili bir il əvvəl açıq şəkildə elan etdi – onun hakimiyyəti dövründə Gürcüstanın Avropa gələcəyi olmayacaq və bununla da xalqın tarixi seçimi olan Avropa inteqrasiya prosesini açıq şəkildə dayandırdı."

InterPress.ge xəbər verir ki, bu barədə “Vahid Milli Hərəkat”ın sədri Tina Bokuçava Tbilisi Dövlət Universitetinin birinci korpusu qarşısında keçirilən etiraz aksiyasında bildirib.

Siyasətçinin sözlərinə görə, bir ildir davam edən etirazlar göstərir ki, cəmiyyət bu kursa heç vaxt razılaşmayacaq.

“Bir il əvvəl İvanişvili 2012-ci ildən onun rejimi şəraitində Gürcüstanın Avropa gələcəyi olmayacağını bildirdi. O, açıq şəkildə  ölkənin Avropa yolunu dayandırdı. Bu isə bizim xalqın tarixi seçimidir və bu yolu gürcü xalqı davam etdirəcək. Bir ildir insanlar nə yoruldu, nə də təslim oldu. Onlar İvanişvilinin Gürcüstanı Rusiyanın təsir dairəsində saxlayan, Avropa gələcəyini əlindən alan siyasətinə boyun əymirlər,” – deyə Bokuçava bildirib.

Onun sözlərinə görə, hakimiyyət etirazçılara təzyiq göstərir, çünki insanlar Avropa dəyərlərindən, Avropa bayrağından və Avropa gələcəyindən imtina etmir:

“Rejim insanların Avropa dəyərlərinə sədaqətinə görə onları həbs etdi. Avropa Komissiyasının son ağır hesabatında da qeyd olunub ki, Gürcüstanın Avropa inteqrasiyası hökumətin addımlarına görə dayanıb.”

Qeyd edək ki, etirazçılar bu gün Tbilisi Dövlət Universitetinin birinci korpusundan parlamentə doğru yürüş edirlər. Aksiyada müxtəlif müxalifət partiyalarının liderləri, fəallar və vətəndaşlar iştirak edir. Onlar yeni parlament seçkilərinin təyin edilməsini və aksiyalar zamanı saxlanılan şəxslərin azad edilməsini tələb edirlər.

Etirazlar bir il əvvəl – 2024-cü il 28 noyabrda, Baş nazir İrakli Kobaxidzenin “Gürcüstanın Avropa İttifaqı ilə danışıqlara 2028-ci ilə qədər başlamayacağı” açıqlamasından sonra başlamışdı.