Narkotik cinayətlərinə görə 50 nəfər saxlanıldı

Daxili İşlər nazirinin müavini Aleksandre Daraxvelidzenin açıqlamasına görə, hüquq-mühafizə orqanları ölkə üzrə aparılan əməliyyatlar nəticəsində narkotik cinayətlərinə görə 50 nəfəri saxlayıb. Onların böyük bir hissəsi narkotik maddələrin satışı ilə məşğul olan şəxslərdir.

InterPress.ge xəbər verir ki, bu barədə nazir müavini bu gün qurumda keçirilmiş brifinqdə məlumat verib.

Onun sözlərinə görə, saxlanılanlar arasında həm Gürcüstan, həm də xarici ölkə vətəndaşları var. Əməliyyatlar mərkəzi kriminal polisi, Tbilisi, Kaxetiya, Acarıstan, İmereti, Sameqrelo–Zemo Svaneti, Quriya və Patrul Polis Departamenti əməkdaşları tərəfindən, məhkəmə qərarı əsasında həyata keçirilib.

Daraxvelidzenin bildirdiyinə görə, istintaq çərçivəsində xüsusilə böyük miqdarda müxtəlif növ narkotik və psixotrop maddələr müsadirə olunub. Saxlanılan şəxslərə qarşı böyük və xüsusilə böyük həcmdə narkotik vasitələrin və psixotrop maddələrin qanunsuz alınması, saxlanması, satışı və satışına yardım göstərilməsi ilə bağlı ittiham irəli sürülüb. Bu cinayətlər 20 ilədək və ya ömürlük həbs cəzası nəzərdə tutur.

Əldə olunan sübutlar – o cümlədən həyata keçirilmiş gizli audio və video çəkilişlər – göstərir ki, saxlanılanların əksəriyyəti narkotik satışı ilə müxtəlif üsullarla məşğul olub. Şəxslərin üzərindən və yaşadığı ünvanlardan, həmçinin istintaq eksperimenti zamanı onların göstərdiyi yerlərdən satışa hazır narkotik və psixotrop maddələr, eləcə də bu məqsədlə istifadə olunan qablaşdırma vasitələri və əldə olunmuş pul vəsaitləri maddi sübut kimi götürülüb.

Nazir müavini bildirib ki, polis əməkdaşları narkotik cinayətkarlığına qarşı mübarizəni 24 saat rejimində davam etdirirlər:

“Qanunun bütün sərtliyi ilə cəzalandırılacaq hər bir şəxs, kim ki, vətəndaşlarımızın, xüsusilə də gənclərin həyatını və sağlamlığını təhlükəyə atır!” – deyə Daraxvelidze vurğulayıb.