Elmuraz Məmmədovun sifarişi ilə adam öldürmək istəyən şəxs saxlanıldı
Gürcüstan Daxili İşlər Nazirliyi və Dövlət Təhlükəsizlik Xidmətinin birgə keçirdiyi əməliyyat nəticəsində sifarişli qətl hadisəsinin qarşısı alınıb.
InterPress.ge xəbər verir ki, bu barədə məlumatı Daxili İşlər Nazirliyi yayıb.
Məlumata əsasən, istintaq zamanı müəyyən edilib ki, 2007-ci il təvəllüdlü təqsirləndirilən şəxs xaricdə yaşayan kriminal avtoritet Elmuraz Məmmədovun tapşırığı ilə Lagodexi bələdiyyəsinin Qabal kəndində yaşayan bir şəxsi öldürməli idi. Qətlin sifariş edilməsinin səbəbi həmin şəxsin təhdid yolu ilə tələb olunan 200 000 ABŞ dollarını ödəməkdən imtina etməsi olub.
Nazirliyin açıqlamasına görə, təqsirləndirilən şəxs cinayəti həyata keçirməyə macal tapmamış polis tərəfindən sifarişli qətl hazırlığına görə, həmçinin odlu silah və sursatın qanunsuz əldə edilməsi, saxlanması və daşınması ittihamı ilə saxlanılıb.
Şəxsi axtarış zamanı ondan “Makarov” tipli tapança, daraq və içərisində güllələr aşkar edilərək götürülüb.
İstintaqın gedişində müəyyən edilib ki, şübhəli şəxs cinayətini etiraf edib. Onun təqsiri həmçinin gizli istintaq materialları, mobil telefonun araşdırılması və digər sübutlarla təsdiqlənib.
Cinayət işi Gürcüstan Cinayət Məcəlləsinin 18-109-cu (qəsdən adam öldürməyə hazırlıq) və 236-cı (qanunsuz silah-sursat əldə etmə və saxlama) maddələri ilə aparılır.
Hüquq-mühafizə orqanları hazırda təqsirləndirilən şəxslə və Elmuraz Məmmədovla cinayət əlaqəsində olan digər şəxslərin müəyyən edilməsi və onların törətmiş ola biləcəyi digər cinayətlərin aşkara çıxarılması istiqamətində əməliyyat-istintaq tədbirlərini davam etdirir.
Xatırladaq ki, Elmuraz Məmmədov bir sıra cinayət işləri üzrə axtarışdadır. O, Interpolun “qırmızı xətti” ilə beynəlxalq axtarışa verilib və hal-hazırda xaricdə gizlənir. Məmmədova son aylarda, o cümlədən bu ilin yayında Lagodexi bələdiyyəsində baş vermiş sifarişli qətl hadisəsinə görə də qiyabi ittiham irəli sürülüb.
Nazirliyin bəyanatında qeyd olunur ki, Gürcüstan hüquq-mühafizə orqanları təşkilatlanmış cinayətkarlığa qarşı qətiyyətli mübarizəni davam etdirəcək və oxşar cinayətlərin qarşısını almaq üçün profilaktik tədbirlər görəcək.
