Tbilisidə yaşayan azərbaycanlı jurnalist Əfqan Sadıqov 275 min lari məbləğində cərimələnib
Tbilisidə yaşayan azərbaycanlı jurnalist Əfqan Sadıqov Gürcüstan Daxili İşlər Nazirliyi tərəfindən yolu bağlama ittihamı ilə ümumilikdə 275 000 lari məbləğində cərimələnib.
InterPress.ge xəbər verir ki, bu barədə məlumatı “Sosial Ədalət Mərkəzi” (SJC) yayıb.
Məlumata görə, Tbilisi Şəhər Məhkəməsi 2025-ci il oktyabrın 23-də Sadıqovu inzibati qaydada təqsirli bilib və ona 14 günlük inzibati həbs cəzası verib. Jurnalist 5 noyabr saat 19:20-də Marneulidəki müvəqqəti saxlama təcridxanasından azad olunacaq.
Sosial Ədalət Mərkəzinin açıqlamasına əsasən, məhkəmə qərarından sonra bəlli olub ki, Əfqan Sadıqov eyni səbəbdən — yolun bağlanmasına görə — əlavə olaraq 55 dəfə, hər dəfə 5000 lari olmaqla cərimələnib. Bu cərimələr 2025-ci il 29 iyul–17 oktyabr tarixləri arasında Daxili İşlər Nazirliyi tərəfindən tətbiq olunub, lakin bu barədə Sadıqova həmin müddətdə heç bir məlumat verilməyib.
Əfqan Sadıqov bundan əvvəl, 9 aylıq həbsdən sonra, 2025-ci il aprelin 17-də girov müqabilində azadlığa buraxılmışdı. Prokurorluq və məhkəmənin qərarına əsasən, ona ölkəni tərk etməyə icazə verilməyib. Nəticədə Sadıqov ailəsindən — həyat yoldaşı və qızlarından — ayrılıqda yaşayır.
O, Tbilisi və Batumidə keçirilən etiraz aksiyalarında fəal iştirak edib, Gürcüstan mediasına və vətəndaş cəmiyyətinə həmrəyliyini bildirib, eyni zamanda jurnalist kimi hadisələri işıqlandırıb. Lakin bu dövrdə ona inzibati cərimələr barədə heç bir rəsmi bildiriş təqdim edilməyib.
Sosial Ədalət Mərkəzi artıq cərimələrin Tbilisi Şəhər Məhkəməsində şikayət edildiyini açıqlayıb. Qurum qeyd edir ki, mövcud məhkəmə təcrübəsi fonunda işin obyektiv qiymətləndirilməsi və insan hüquqlarına əsaslanan qərarın çıxarılması ehtimalı azdır.
Mərkəzin bəyanatında bildirilib ki, “Gürcü Arzusu” hökuməti son dövrlərdə qanunvericiliyi sərtləşdirərək, təkrar yol bağlama hallarını artıq cinayət məsuliyyəti kimi müəyyən edib. Yeni dəyişikliklərə əsasən, belə hərəkətə görə bir ilədək azadlıqdan məhrumetmə cəzası nəzərdə tutulur.
