Tbilisidə Gürcüstan və Azərbaycan təhlükəsizlik xidmətlərinin rəhbərləri görüşüb

Gürcüstan Dövlət Təhlükəsizliyi Xidmətinin rəisi Mamuka Mdinaradze Tbilisidə rəsmi səfərdə olan Azərbaycan Dövlət Təhlükəsizliyi Xidmətinin rəisi Əli Nağıyevi qəbul edib.

InterPress.ge xəbər verir ki, bu barədə məlumatı Gürcüstan Dövlət Təhlükəsizliyi Xidməti yayıb.

Məlumata görə, görüşdə tərəflər Gürcüstan və Azərbaycan arasında mövcud strateji tərəfdaşlığın əsas istiqamətlərini və gələcək təşəbbüsləri müzakirə ediblər. Bu təşəbbüslərin məqsədi təhlükəsizlik sahəsində əlaqələrin daha da möhkəmləndirilməsi olub.

“Görüşdə iki ölkənin təhlükəsizlik qurumları arasında məlumat mübadiləsi və təcrübə paylaşımı istiqamətində əməkdaşlığın gücləndirilməsinin vacibliyi vurğulandı. Qeyd olundu ki, Gürcüstan və Azərbaycan təhlükəsizlik xidmətlərinin əməkdaşlığı iki ölkə arasında münasibətlərin inkişafına, eləcə də regionda sülhün və sabitliyin möhkəmləndirilməsinə mühüm töhfə verir.

Bundan əlavə, görüşdə regionda baş verən aktual proseslər və çağırışlar da müzakirə olunub,” – deyə məlumatda bildirilir.

Mamuka Mdinaradze Əli Nağıyevə səfərinə görə təşəkkürünü bildirib və onun Gürcüstana rəsmi səfərinin əhəmiyyətini qeyd edib.

Görüşdə hər iki ölkənin təhlükəsizlik xidmətlərinin rəhbər müavinləri və struktur bölmələrinin rəhbərləri iştirak ediblər.

Görüşdən sonra Mamuka Mdinaradze və Əli Nağıyev Gürcüstanın ərazi bütövlüyü uğrunda həlak olmuş qəhrəmanların xatirə memorialını və Heydər Əliyevin abidəsini əklillərlə bəzəyiblər.