İrakli Kobaxidze: “Eagle Hills layihələri minlərlə yüksək maaşlı iş yeri yaradacaq”

Gürcüstanın baş naziri İrakli Kobaxidze “Eagle Hills” şirkətinin Gürcüstan ofisinin açılış mərasimində çıxış edərək bildirib ki, bu layihələr ölkə vətəndaşları üçün minlərlə yüksək maaşlı iş yerinin yaranmasına səbəb olacaq.

InterPress.ge xəbər verir ki, bu barədə məlumatı Gürcüstan Hökumətinin Administrasiyasının mətbuat xidməti yayıb.

Baş nazirin sözlərinə görə, yeni investisiyalar həm tikinti, həm də əməliyyat mərhələsində məşğulluğun artmasına mühüm töhfə verəcək.

“Bu əməkdaşlıq Tbilisi və Batuminin şəhər mənzərəsini daha da inkişaf etdirəcək, yeni cazibə mərkəzləri yaradacaq və Gürcüstanın regional lider və əsas investisiya mərkəzi kimi mövqeyini daha da gücləndirəcək. Əminəm ki, bu tərəfdaşlıq həm qonşu bizneslər üçün yeni imkanlar açacaq, həm də ölkə iqtisadiyyatının inkişafına güclü təkan verəcək,” – deyə Kobaxidze vurğulayıb.

Baş nazir bildirib ki, hökumətin əsas siyasəti strateji xarakterli investisiyalara dəstək verməkdir:

“Bizim məqsədimiz elə investisiyaları dəstəkləməkdir ki, onlar yeni iş yerləri yaratsın, iqtisadiyyatı gücləndirsin və Gürcüstanın qlobal investisiya xəritəsində mövqelərini möhkəmləndirsin.”

Kobaxidze çıxışı zamanı Birləşmiş Ərəb Əmirliklərinin Prezidenti Şeyx Məhəmməd bin Zayed Əl Nəhəyanı, EMAAR Qrupunun və Eagle Hills şirkətinin təsisçisi Məhəmməd Alabarı və BƏƏ-dən olan bütün tərəfdaşları bu “tarixi qərara” görə təşəkkür edib.

“Əminəm ki, bu layihələr Gürcüstanın yeni vizit kartına çevriləcək. Uğurlar arzulayıram və Gürcüstan hökuməti adından sizə tam dəstək və əməkdaşlıq vəd edirəm,” – deyə baş nazir bəyan edib.