Gürcüstan Daxili İşlər Nazirliyinin məlumatına görə, əvvəllər məhkum olunmuş iki şəxs dələduzluq ittihamı ilə Acarıstan bölgəsində saxlanılıb.
Nazirliyin yaydığı məlumata əsasən, Batumi Şəhər Polis İdarəsinin əməkdaşları tərəfindən aparılan əməliyyat-axtarış və istintaq tədbirləri nəticəsində 1988-ci il təvəllüdlü G.Z. və 2000-ci il təvəllüdlü B.X. adlı şəxslər tutulub.
İlkin istintaq məlumatına görə, G.Z. adlı şəxs bir vətəndaşa məxsus iki avtomobili alacağını və onların dəyərini hissə-hissə ödəyəcəyini vəd edib, lakin razılaşmanı yerinə yetirməyib. Bu yolla o, 1986-cı il təvəllüdlü E.J.-yə məxsus nəqliyyat vasitələrini ələ keçirib və zərərçəkmişə 30 167 lari məbləğində maddi zərər vurub. Bundan əlavə, G.Z.-nin başqa bir vətəndaşdan da dələduzluq yolu ilə pul aldığı müəyyən edilib.
Digər saxlanılan şəxs – B.X. isə istintaq məlumatına görə, bir müəssisəyə məxsus 50 000 laridək dəyəri olan ət məhsullarını qanunsuz mənimsəyib.
Hər iki faktla bağlı istintaq Gürcüstan Cinayət Məcəlləsinin 180-ci maddəsi (dələduzluq) ilə aparılır. Cinayət əməli 9 ilədək azadlıqdan məhrumetmə cəzasını nəzərdə tutur.
.jpg)