Giorgi Kalandarişvili: 4 oktyabr seçkiləri üçün bütün seçki məntəqələri hazırdır

Ölkə üzrə ümumilikdə 3 061 seçki məntəqəsi açılıb. Onlardan 2 284-də səsvermə elektron qaydada, 777-də isə ənənəvi üsulla keçiriləcək və bütün məntəqələr seçiciləri qəbul etməyə tam hazırdır.

InterPress.ge xəbər verir ki, bu barədə Gürcüstan Mərkəzi Seçki Komissiyasının (MSK) sədri Giorgi Kalandarişvili bildirib.

Onun sözlərinə görə, 4 oktyabrda keçiriləcək seçkilərdə vətəndaşlar 64 bələdiyyə şurasının (Sakrebulo) 2 058 üzvünü və 64 meri seçəcəklər. Səsvermə 08:00-da başlayacaq və 20:00-da başa çatacaq.

Seçki prosesini 28 beynəlxalq və 27 yerli təşkilatın müşahidəçiləri, həmçinin 73 KİV-dən minə yaxın jurnalist işıqlandıracaq.

Kalandarişvili bildirib ki, bu, Gürcüstanda bələdiyyə seçkilərində geniş miqyasda elektron texnologiyaların tətbiq ediləcəyi ilk seçkidir:

Seçici elektron məntəqədə xüsusi markerlə bülleten üzərində seçdiyi namizədi qeyd edəcək və bülleten avtomatik sayğac cihazına yerləşdiriləcək.

Qurğu avtomatik olaraq səsləri sayacaq və nəticələri MSK-ya ötürəcək.

Paralel olaraq şəffaflığın təmin olunması üçün bülletenlər əl ilə də sayılacaq.

Sədrin sözlərinə görə, ümumi seçici sayı 3 513 818 nəfərdir, onların 3 130 348-i elektron texnologiyalardan istifadə edəcək. Seçkilərdə bu il ilk dəfə təxminən 47 min gənc iştirak edəcək.

MSK rəhbəri seçiciləri fəallığa çağıraraq qeyd edib ki, seçkilər yüksək peşəkarlıqla və beynəlxalq standartlara uyğun keçiriləcək:

“Seçkilər ümumi işimizdir. Vətəndaşları fəal olmağa, seçkilərə gəlməyə və öz seçimlərini etməyə çağırıram. Bütün tərəflər – siyasi partiyalar, müşahidəçilər, KİV – seçki prosesinin şəffaf və sakit şəraitdə keçməsinə töhfə verməlidirlər.” – deyə Giorgi Kalandarişvili vurğulayıb.