Tbilisi Məhkəməsi Nika Meliyanı yenidən həbsdə saxladı

Tbilisi Şəhər Məhkəməsi “Dəyişiklik üçün Koalisiya”nın liderlərindən biri Nika Meliyanı həbsdə saxlaması barədə qərar qəbul edib.

InterPress.ge xəbər verir ki, qərarı hakim Elene Qoquadze elan edib.

Bu gün Meliyanın işi üzrə məhkəmədə əsas müzakirələr başlayıb. Tərəflər giriş nitqləri söylədikdən sonra, Meliyaya tətbiq edilən həbs qətimkan tədbiri yenidən nəzərdən keçirilib və qüvvədə saxlanılıb. Qeyd edək ki, o, hakimin üstünə su tökməkdə də ittiham olunur.

Meliyanın vəkili Beka Kviniqadzenin sözlərinə görə, müvəkkilinə qarşı artıq üçüncü dəfə həbs tədbiri seçilib:

“Bu gün məhkəmədə hakimin üstünə su tökməklə bağlı cinayət işi üzrə əsas müzakirələr başladı. Hakim yenidən həbs qətimkan tədbirini qüvvədə saxladı. İronik olan odur ki, hakim arqument kimi göstərdi ki, guya həbsdə olan Nika Meliya şahid polis əməkdaşlarına təsir göstərə bilər, sübutları məhv edə bilər və ya gizlənə bilər. Hakim Elene Qoquadzeyə gözəl yumor hissi aşkarlandı,” – deyə vəkil bildirib.

Xatırladaq ki, Nika Meliya Gürcüstan CM-nin 366-cı maddəsinin 2-ci bəndi ilə (məhkəməyə hörmətsizlik, hakimə təhqir) ittiham olunur. Bu maddə 2 ilədək azadlıqdan məhrumetməni nəzərdə tutur.

Meliya 29 mayda polis tərəfindən inzibati qaydada saxlanılıb. Ertəsi gün parlamentin müvəqqəti istintaq komissiyasına getməməsi ilə bağlı məhkəmədə ona həbs qətimkan tədbiri seçilib. Məhkəmə zalında o, hakim Zviad Şvanqiradzeyə çıxış edərkən üstünə su tökmüşdü.

Nika Meliya artıq parlamentin müvəqqəti istintaq komissiyasının tələbini yerinə yetirmədiyinə görə 8 ay azadlıqdan məhrumetmə və 2 il müddətinə vəzifə tutmaq qadağası ilə məhkum edilib. Bundan əlavə, 2019-cu il hökmü ilə qüvvədə qalan 25 000 lari məbləğində cərimə də hökmə əlavə edilib.