Alan Qaqloyev: “Gürcüstan hökuməti Cənubi Osetiyanı ‘qaytarılmalı’ obyekt kimi görməkdən imtina etməlidir”

"Gürcüstan hakimiyyəti Cənubi Osetiyanı “qaytarılmalı” obyekt kimi görməkdən əl çəkməlidir."

InterPress.ge xəbər verir ki, bu barədə Osetiyanın işğal olunmuş Çxinvali bölgəsinin  “prezidenti” Alan Qaqloyev Rusiya mediasına müsahibəsində bildirib.

“Biz bərabər əsasda praqmatik dialoqa hazır olduğumuzu açıq bəyan edirik. Lakin belə dialoq yalnız o halda mümkün olacaq ki, Gürcüstan hakimiyyəti revanşist illüziyalarından imtina etsin, keçmiş aqressiyaya görə məsuliyyəti üzərinə götürsün və Cənubi Osetiyanı ‘qaytarılmalı’ obyekt kimi qəbul etməyi dayandırsın”, – deyə Qaqloyev qeyd edib.

Onun sözlərinə görə, Cənubi Osetiya hələ də “güc tətbiq etməmək haqqında sazişin imzalanmasını” tələb edir.

“ Təəssüf ki, Tbilisinin Cənubi Osetiya və Abxaziya ilə bağlı güc tətbiq etməmək haqqında sənədə imza atması barədə danışmaq mümkün deyil. Gürcüstanın Baş naziri İrakli Kobaxidzenin son bəyanatları göstərdi ki, Gürcüstan hakimiyyəti bərabərhüquqlu və sivil dialoqun qurulmasına maraqlı deyil. Əgər Cenevrə müzakirələrinin əsas məqsədi – güc tətbiq etməmək haqqında sazişin imzalanması qeyri-ciddi elan edilirsə, bu, Rusiya, Cənubi Osetiya və Abxaziyanın uzunillik səylərini sıfıra endirir və yeganə beynəlxalq platformanın əhəmiyyətini azaldır”, – deyə Qaqloyev vurğulayıb.