Gürcüstan korrupsiyanın azlığı üzrə Avropanın ən yaxşı iyirmiliyinə daxil olub

Avropa Komissiyasının “Dünya Ədalət Layihəsi” çərçivəsində dərc etdiyi Korrupsiyanın olmaması indeksinə əsasən, Gürcüstan 100 ballıq qiymətləndirmə sistemində 67% nəticə göstərib və dünyada 35-ci yeri, Avropada isə ən yaxşı 20 ölkə arasında yer alıb.

InterPress.ge xəbər verir ki, bu barədə məlumatı “Gürcü Arzusu” yayıb.

Partiyanın məlumatına görə, korrupsiyanın azlığı baxımından Gürcüstan bütün Avropa İttifaqına üzv namizəd ölkələri, eləcə də Aİ və NATO-nun 14 üzv dövlətini – İtaliya, Xorvatiya, Yunanıstan, Sloveniya, Slovakiya, Rumıniya, Macarıstan, Bolqarıstan, Malta, Kipr, Monteneqro, Şimali Makedoniya, Türkiyə və Albaniyanı qabaqlayıb.

Avropada korrupsiyanın ən az olduğu ölkələr sırasında Danimarka, Norveç və İsveç liderlik edir. Araşdırma həmçinin ən korrupsiyalaşmış dövlətləri də müəyyən edib: siyahının əvvəlində Ukrayna, ardından Albaniya və Moldova gəlir. Rusiya isə korrupsiyanın səviyyəsinə görə Serbiyadan sonra 5-ci yerdədir.

Avropa Komissiyasının açıqlamasında bildirilib ki, indeks hökumətdə korrupsiyanın olmamasını ölçür və onun üç əsas formasını araşdırır: rüşvət, ictimai və şəxsi maraqların sui-istifadəsi, həmçinin dövlət vəsaitləri və resurslarının mənimsənilməsi. Bu göstəricilər icra hakimiyyəti, məhkəmə, ordu, polis və qanunverici orqanlarda çalışan vəzifəli şəxslərlə bağlı qiymətləndirilib.