Kobaxidze: “Son 7 ildə Konstitusiyada heç bir dəyişiklik edilməyib, bu isə dövlətin sabit inkişafına təsir göstərdi”

"2018-ci ildə qüvvəyə minmiş mövcud Konstitusiyanın qəbulundan sonra, son 7 il ərzində sənəddə heç bir dəyişiklik edilməyib."

InterPress.ge xəbər verir ki, bu barədə Gürcüstanın Baş naziri İrakli Kobaxidze Konstitusiya gününə həsr olunmuş tədbirdə çıxışında bildirib.

Onun sözlərinə görə, Konstitusiyanın sabitliyi birbaşa dövlətin inkişafına və ölkədə sülhün, sabitliyin qorunmasına xidmət edib.

“Bu müddətdə bizim – hakim komandanın tərəfindən Konstitusiyaya heç bir düzəliş edilmədi, onu öz maraqlarımıza uyğunlaşdırmaq cəhdi olmadı. Halbuki əvvəlki illərdə hakimiyyət çox vaxt Konstitusiyanı öz məqsədlərinə uyğun dəyişməyə çalışırdı. Son 7 ildə isə artıq həm daxili, həm də xarici opponentlər Gürcüstanın əsas qanununu özlərinə uyğunlaşdırmağa cəhd göstərdilər.

Xüsusilə, 19 aprel sazişi ilə bağlı danışıqları xatırlada bilərəm. Əsas tələblərdən biri Konstitusiyaya müxtəlif dəyişikliklərin daxil edilməsi idi. Mən isə həmkarlarıma izah etdim ki, Konstitusiyanın dəyişdirilməsi çox mürəkkəb prosedurla bağlıdır, geniş ictimai müzakirəni, xalqın prosesə qoşulmasını və parlamentdə yüksək kvorumla qəbulunu tələb edir. Bu səbəbdən siyasi sazişdə konstitusion dəyişikliklərə dair hər hansı maddənin qeyd olunmasını yolverilməz hesab etdik.

O dövrdə ABŞ və Aİ-nin səfirlərindən bu məsələyə görə çox kobud cavab aldıq. Lakin biz ölkəmizin milli maraqlarını qoruduq və heç kimə Konstitusiyanı aşağılamaq və ya öz maraqlarına uyğun dəyişmək imkanı vermədik. Şübhəsiz ki, bu yanaşma gələcəkdə də davam etməlidir”, – deyə Baş nazir Kobaxidze vurğulayıb.