Aİ qanunvericiliyi LGBT evliliyinin eyni anlayışda tanınmasını tələb etmir – İsveçin Aİ məsələləri üzrə naziri
Avropa İttifaqının qanunvericiliyi bütün azlıqlar, o cümlədən LGBT icmasının hüquqlarının tam hüquqi müdafiəsinə zəmanət verir, lakin təşkilat nə üzv dövlətlərdən, nə də namizəd ölkələrdən LGBT evliliyini qanunvericilikdə eyni anlayışla qəbul etməyi tələb etmir.
InterPress.ge xəbər verir ki, bu barədə İsveçin Avropa İttifaqı məsələləri üzrə naziri Yessika Rozenkrants “Interpressnews”un sorğusuna yazılı cavabında bildirib.
Nazir bu bəyanatla İsveçin baş naziri Ulf Kristerssonun sosial şəbəkədə yaydığı paylaşıma aydınlıq gətirib. Həmin paylaşımda Kristersson bildirmişdi ki, Aİ-yə inteqrasiya çərçivəsində Ukrayna eynicinsli tərəfdaşlıq məsələsini tənzimləməli və LGBT icmasının tam hüquqi müdafiəsini təmin etməlidir.
Yessika Rozenkrants qeyd edib ki, İsveçin LGBT hüquqlarının müdafiəsi sahəsində zəngin təcrübəsi var və bu, Avropa İttifaqının əsas dəyərlərindən biridir.
“İsveçin LGBT icmasının hüquqlarını dəstəkləmək sahəsində böyük təcrübəsi var və bu istiqamətdə fəallığını qürurla davam etdirəcək. Aİ müqavilələri bütün azlıqlar, o cümlədən LGBT icmasının hüquqlarının tam hüquqi müdafiəsinə zəmanət verir. Aİ vətəndaşlarının hamısının bərabər və ayrılmaz hüququ var ki, ayrı-seçkilikdən, nifrətdən və zorakılıq təhlükəsindən azad şəraitdə yaşasın. Bu, İttifaqın əsas dəyəridir və namizəd ölkələr üçün mütləq şərtdir. Bununla yanaşı, Aİ qanunvericiliyi üzv dövlətlərdən və ya namizəd ölkələrdən LGBT evliliyinin eyni anlayışla qəbul edilməsini tələb etmir”, – deyə Rozenkrants bildirib.
Xatırladaq ki, ötən həftə İsveçin baş naziri Ulf Kristersson sosial şəbəkədə bu açıqlamanı yaymışdı:
“Bu gün Saqerskada ukraynalı LGBTQI veteranları qəbul etdim. Onlar cəbhədə həyatlarını riskə atmaqla və digər yollarla bu mübarizədə iştirak etməklə Ukraynanın müdafiəsinə yardım edirlər. Həm də onlar Ukraynanın uğrunda döyüşdüyü liberal dəyərlərin canlı ifadəsidirlər.
Hazırda eynicinsli cütlüklərin Ukraynada evlənməsi və ya tərəfdaşlığının qeydiyyatı mümkün deyil. Bütün azlıqlar, o cümlədən LGBTQI icmasının hüquqlarının tam hüquqi müdafiəsi bizim üçün Ukraynanın Aİ-yə inteqrasiyasının mühüm hissəsidir və biz bu prosesi dəstəkləyirik. Ukraynanın güclü tərəfdaşı olaraq, İsveç bu məsələnin həyata keçirilməsini diqqətlə izləyəcək”, – deyə Kristersson yazıb.
